Dainik Maval News : पुणे विभागातील पाच जिल्ह्यांमध्ये पदवीधर आणि शिक्षक मतदार संघांच्या मतदार यादी नव्याने तयार करण्याच्या कार्यक्रमाअंतर्गत ६ नोव्हेंबरपर्यंत मतदार नोंदणीची संधी उपलब्ध असून सर्व पात्र पदवीधर व शिक्षकांनी नोंदणी करावी, असे आवाहन विभागीय आयुक्त तथा पुणे विभाग पदवीधर व शिक्षक मतदार संघाचे मतदार नोंदणी अधिकारी डॉ. चंद्रकांत पुलकुंडवार यांनी केले आहे.
विभागीय आयुक्त डॉ. पुलकुंडवार यांनी दूरदृष्यप्रणालीद्वारे पाचही जिल्ह्यांचे जिल्हाधिकारी तसेच विविध शासकीय विभागांच्या प्रमुखांशी संवाद साधून मतदार नोंदणीच्या प्रगतीचा आढावा घेतला. यावेळी विभागातील पाचही जिल्ह्याचे जिल्हाधिकारी तसेच सर्व विभागस्तरीय अधिकारी दुरदृश्य प्रणालीद्वारे उपस्थित होते.
पुणे विभाग पदवीधर व शिक्षक मतदार संघासाठी १ नोव्हेंबर २०२५ या अर्हता दिनांकावर आधारित नव्याने मतदार याद्या (डी – नोव्हो) तयार करण्याच्या कार्यक्रमांतर्गत मतदार नोंदणी सुरू आहे. मतदार नोंदणीसाठी ऑफलाईन सोबतच भारत निवडणूक आयोगाकडून https://mahaelection.gov.in/Citizen/Login या संकेतस्थळावर ऑनलाईन पद्धतीने मतदार नोंदणीची सुविधा उपलब्ध करुन देण्यात आली आहे.
सन २०२६ मध्ये पुणे विभाग पदवीधर व शिक्षक मतदारसंघाकरिता होणाऱ्या निवडणुकीसाठी पुणे, कोल्हापूर, सोलापूर, सांगली आणि सातारा या जिल्ह्यांचे जिल्हाधिकारी हे सहायक मतदार नोंदणी अधिकारी आहेत. तसेच प्रत्येक विधानसभा मतदारसंघांचे मतदार नोंदणी अधिकारी हे त्यांच्या कार्यक्षेत्रापुरते मतदार नोंदणीचे काम करीत आहेत. या कार्यक्रमाअंतर्गत यापूर्वीच्या पदवीधर किंवा शिक्षक मतदारसंघाच्या मतदारयादीत नाव समाविष्ट असले तरी पुन्हा नव्याने पात्र मतदारांचे नाव यादीत समाविष्ट करणे आवश्यक आहे, असेही डॉ. पुलकुंडवार यांनी नमूद केले.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा –
– आचारसंहिता लागू, नगरपरिषद व नगरपंचायतीसाठी 2 डिसेंबरला मतदान आणि 3 डिसेंबरला मतमोजणी – वाचा सविस्तर
– अखेर बिगुल वाजले ! महाराष्ट्रात स्थानिक स्वराज्य संस्थांच्या निवडणुका जाहीर; पहिल्या टप्प्यात नगरपरिषद, नगरपंचायतींच्या निवडणुका होणार
– स्थानिक स्वराज्य संस्थांच्या निवडणुकांमध्ये व्हीव्हीपॅट मशीनचा वापर शक्य नाही ; निवडणूक आयोगाचे स्पष्टीकरण
