वडगाव मावळ येथील येथील शिवजयंती उत्सव समितीने चार दिवसांच्या महोत्सवाचे आयोजन केले होते. दिनांक 25 तारखेपासून ते 28 तारखेपर्यंत हा सोहळा सुरु होता. विविध स्पर्धा, भव्य मिरवणूक, पुरस्कार वितरण, शाहिरी कार्यक्रम व ऐतिहासिक नाटक अशा विविध कार्यक्रमांनी राजे शिवछत्रपती जयंती महोत्सव साजरा झाला. विविध क्षेत्रातील गुणवंतांचे कौतुक, सर्वधर्मीय नागरिकांमध्ये एकोपा व गावचे गावपण जपण्याच्या उद्देशाने गेल्या 45 वर्षांपासून हा शिवजयंती महोत्सव सुरू असल्याचे संस्थापक भास्करराव म्हाळसकर यांनी सांगितले. ( मावळ, पिंपरी-चिंचवड, पुणे परिसरातील ताज्या अपडेट्ससाठी दैनिक मावळचा व्हॉट्सअ‍ॅप चॅनेल जॉईन करा )
दिनांक 25 तारखेला होळीच्या दुसऱ्या दिवशी सकाळी मावळ खरेदी विक्री संघाचे अध्यक्ष शिवाजी असवले, उपाध्यक्ष अमोल भोईरकर, संचालक गणेश विनोदे आदींच्या हस्ते शिवप्रतिमेचे पूजन झाले व त्यानंतर जय बजरंग तालीम मंडळाच्या संयोजनाने दगडी गोटी उचलण्याची स्पर्धा झाली. दिनांक 26 तारखेला सकाळी वडगाव सोसायटीचे अध्यक्ष नीलेश म्हाळसकर, पंढरीनाथ भिलारे आदींच्या हस्ते शिवप्रतिमेचे पूजन झाले. सायंकाळी महिलांसाठी ‘खेळ खेळूया पैठणीचा’ हा स्पर्धात्मक कार्यक्रम झाला. विजेत्या प्रथम तीन क्रमांकांना अनुक्रमे मानाची पैठणी, सोन्याची नथ व चांदीचा छल्ला अशी पारितोषिके देण्यात आली. सहभागी सर्व महिलांना अनिता संभाजी म्हाळसकर यांच्यावतीने आकर्षक भेटवस्तू देण्यात आली. नीता चोरडिया यांनी सूत्रसंचालन केले. ( Raje Shiv Chhatrapati Jayanti Festival celebrated with great enthusiasm in Vadgaon Maval )
दिनांक 27 तारखेला सकाळी देवस्थानचे विश्वस्त गणेश ढोरे, सुभाष जाधव, नारायण ढोरे आदींच्या हस्ते शिव प्रतिमेचे पूजन झाले. सायंकाळी शाहीर आविष्कार देशिंगे ( सांगली ) यांचा पोवाड्यांचा बहारदार कार्यक्रम झाला. गुरुवारी (दिनांक 28) सकाळी सातला शिवजयंती उत्सव समितीचे संस्थापक भास्करराव म्हाळसकर, अध्यक्ष अनंता कुडे व इतर पदाधिकाऱ्यांच्या हस्ते शिवप्रतिमेचे पूजन झाले. महिला संचालक व सहजयोग केंद्राच्या सहभागाने शिवजन्मोत्सव अतिशय उत्साहात साजरा झाला. विविध किल्ल्यावरून आलेल्या शिवज्योतींचे लायन्स क्लबच्यावतीने स्वागत करण्यात आले. त्यानंतर लहान मुलांसाठी विविध स्पर्धा तसेच महिलांसाठी रांगोळी स्पर्धा घेण्यात आली. सायंकाळी बँड पथकाच्या साह्याने शिवप्रतिमेची मिरवणूक काढण्यात आली. मिरवणुकीत भगवे फेटे परिधान करून, महिलांसह शिवप्रेमी नागरिक सहभागी झाले होते. शिवकालीन मर्दानी खेळांची प्रात्यक्षिके सादर करण्यात आली. सायंकाळी स्पर्धांचा पारितोषिक वितरण समारंभ व विविध क्षेत्रातील व्यक्तींचा पुरस्कार वितरण सोहळा झाला. रायबा या छत्रपतींच्या जीवनावरील ऐतिहासिक नाटकाने महोत्सवाची सांगता झाली.
पुरस्कारार्थींची यादी ;
रतनबाई बाफना (राजमाता जिजाऊ पुरस्कार)
पांडुरंग महाराज गायकवाड ( सांप्रदायिक भूषण पुरस्कार)
पत्रकार ज्ञानेश्वर वाघमारे ( कर्तव्यदक्ष पुरस्कार )
मारुतराव दळवी (कृषिनिष्ठ पुरस्कार )
संतोष भिलारे (युवा उद्योग रत्न पुरस्कार)
राजू माडगी व सूरज पाटोळे यांचा विशेष सत्कार करण्यात आला.
अधिक वाचा –
– मावळ लोकसभेसाठी मराठा समाजाकडून ‘या’ नावाची होतेय चर्चा । Maval Lok Sabha Election 2024
– आमदार सुनिल शेळके हे श्रीरंग बारणे यांचा प्रचार करणार का? । Maval Lok Sabha Election 2024
– महत्वाची बातमी! पिंपरी चिंचवड आरटीओ कार्यालय मार्च अखेरीस सुट्टीच्या दिवशी देखील सुरु राहणार । Pimpri Chinchwad Regional Transport Office
