‘मी कुणाला कुठेही पाठवलं नाही, अफवांवर विश्वास ठेवू नका, हलक्या कानाचे राहू नका, विरोधी उमेदवाराला भेटायला जाऊ नका’

मावळ लोकसभा मतदारसंघात महायुतीच्या उमेदवाराच्या अर्थात श्रीरंग बारणे यांच्या प्रचारार्थ महायुतीच्या सर्व घटक पक्षांची संयुक्त बैठक आज (दि. 8 एप्रिल) पार पडली. या बैठकीला अजित पवार, चंद्रकांत पाटील यांच्यासह इतर अनेक नेते, पदाधिकारी उपस्थित होते. मावळ लोकसभा मतदारसंघामध्ये सध्यातरी श्रीरंग बारणे आणि संजोग वाघेरे यांच्यात दुरंगी लढत होणार असल्याचे दिसत आहे. यात महायुतीचे उमेदवार म्हणून श्रीरंग बारणे यांच्या प्रचारासाठी उपमुख्यमंत्री अजित पवार हे आज मावळ लोकसभेत आले होते. यावेळी त्यांनी पदाधिकारी आणि कार्यकर्ते यांना उद्देशून भाषण केले. ( मावळ, पिंपरी-चिंचवड, पुणे परिसरातील ताज्या अपडेट्ससाठी दैनिक मावळचा व्हॉट्सअ‍ॅप चॅनेल जॉईन करा )

शिवसेना उद्धव बाळासाहेब ठाकरे पक्षाचे एकूण महाविकास आघाडीचे मावळ लोकसभेचे उमेदवार संजोग वाघेरे हे एकेकाळी अजित पवार यांचे निकटवर्तीय होते. अजितदादा यांचे ते खंदे समर्थक मानले जात होते. परंतू लोकसभा निवडणूकांच्या तोंडावर त्यांनी शिवसेना ठाकरे गटात प्रवेश केला. आता ते श्रीरंग बारणे यांच्या विरोधात उमेदवार म्हणून उभे ठाकले आहेत. परंतू मतदारसंघात दबक्या आवाजात अनेक उलटसुलट चर्चा होत आहेत. संजोग वाघेरे हे देखील काही बाबतीत धक्कादायक खुलासा करत आहेत, त्याबद्दल अजित पवार यांनी आपल्या भाषणात प्रकाश टाकला.
हेही वाचा – र…राजकारणाचा! ज्याने लेकाचा पराभव केला, त्याच्याच प्रचारासाठी पित्याची धावाधाव । Maval Lok Sabha

अजित पवार यांनी सभेत बोलताना संजोग वाघेरे यांच्यावर निशाणा तर साधलाच. सोबतच, विरोधी उमेदवार (संजोग वाघेरे) कदाचित असं सांगेल की अजित दादांनी मला उभं राहायला सांगितलं आहे, पण तसं नाही, असेही अजित पवार म्हणाले. “विरोधी उमेदवार (संजोग वाघेरे) कदाचित असं सांगेल की अजित दादांनी मला उभं राहायला सांगितलं आहे. असं अजिबात नाही, अख्खा महाराष्ट्र जाणतो मी असलं काही करत नाही. आपला उमेदवार हा श्रीरंग बारणे आहे, धनुष्यबाण या चिन्हासमोरील बटन दाबा, भूलथापांना बळी पडू नका,” असे अजित पवार यांनी स्पष्ट केले.

गप्पा मारायला देखील जाऊ नका – अजित पवार
“कोणत्याही परिस्थितीत मावळमधून महायुतीचा उमेदवार निवडून आला पाहिजे. गेल्यावेळी पेक्षा जास्त मताधिक्य मिळाले पाहिजे. आपला विरोधी उमेदवार संजोग वाघेरे यांच्याशी अनेक वर्षाचे संबंध आहेत. परंतू, निवडणुकीची प्रचार यंत्रणा सुरू झाल्यावर काही गोष्टी पाळाव्या लागतात. 13 तारखेचे मतदान होईपर्यंत विरोधी उमेदवाराला भेटायला जाऊ नका, गप्पा-टप्पा मारायला जाऊ नका, निवडणूक काळापर्यंत नातेसंबंध बाजूला ठेवावे. वाघेरे सांगत आहेत की, मीच त्यांना तिकडे पाठवले, लढायला लावले. हे सगळे खोटे असून अफवांवर विश्वास ठेवू नका,” असे आवाहन अजित पवार यांनी केले. ( Maval Lok Sabha Shiv Sena candidate Shrirang Barane vs Sanjog Waghere Ajit Pawar speech in Mahayuti Sabha )

अधिक वाचा –
– तळेगाव दाभाडे शहराचे ग्रामदैवत श्री डोळसनाथ महाराज सार्वत्रिक उत्सव 2024 निमित्त भरगच्च कार्यक्रमांचे आयोजन
– ‘नरेंद्र मोदी यांना तिसऱ्यांदा पंतप्रधान बनवण्यासाठी श्रीरंग बारणे यांचा विजय महत्वाचा’ – भाजपा प्रदेशाध्यक्ष चंद्रशेखर बावनकुळे
– मावळ लोकसभेचे उमेदवार संजोग वाघेरे यांच्या प्रचारार्थ महाविकास आघाडीच्या पदाधिकारी आणि कार्यकर्त्यांचा मेळावा संपन्न