Dainik Maval News : हवामान विभागाने दिलेल्या जोरदार पावसाच्या इशाऱ्याचे कारण देत प्रशासनाकडून 27 जुलैपासून पुन्हा एकदा मावळ आणि मुळशी तालुक्यातील सर्व पर्यटन स्थळांवर अनिश्चित काळापर्यंत बंदी घातली आहे. प्रशासनाच्या निर्णयाने पर्यटनावर अवलंबून असलेली हजारो कुटुंब अडचणीत सापडली आहेत. प्रशासनाच्या या पर्यटन बंदी विरोधात लोणावळा-खंडाळा टॅक्सी असोसिएशनच्या (Lonavala Khandala Taxi Association) वतीने सोमवारी पायी मोर्चा काढण्यात आला. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
मावळ तालुक्यातील लोणावळा हे शहर सर्वाधिक पावसाचे ठिकाण आहे. त्यामुळेच येथे वर्षाविहारासाठी लाखो पर्यटक येत असतात. दरवर्षी येणारे पर्यटक यांमुळे येथील हजारो नागरिकांची अर्थव्यवस्था ही पर्यटनावर अवलंबून राहिलेली आहे. परंतू यंदा प्रशासनाकडून सातत्याने पर्यटन बंदी लावली जात आहे. मावळ व मुळशी तालुक्यामधील अनेक गावे ही फक्त पर्यटनावर अवलंबून आहेत. फक्त लोणावळा शहराचा विचार केला तर शहरातील संपूर्ण अर्थकारण आणि उपजीविकेचे साधन हे पर्यटनावर आधारित आहे. टॅक्सिचालक, रिक्षा चालक, टपरीधारक, हॉटेल व्यवसायासह इतर व्यावसाय करणारी हजारो कुटुंब पावसाळी पर्यटनावर अवलंबून आहेत. मात्र यंदा प्रशासनाच्या पर्यटन बंदीच्या निर्णयामुळे सर्वांच्या व्यवसायावर कुऱ्हाड कोसळली आहे. ( Lonavala Khandala Taxi Association march against tourism ban )
त्यामुळे प्रशासनाने पारित केलेला पर्यटन बंदीचा आदेश मागे घ्यावा या मागणीसाठी लोणावळा-खंडाळा टॅक्सी असोसिएशनच्या वतीने राम मंदिर ते भुशी धरण असे पाच किलोमीटर दूर पायी चालत जाऊन मंडळ अधिकारी जाधव यांच्याकडे विविध मागण्याचे निवेदन देण्यात आले. माजी नगरसेवक निखिल कवीश्वर यांच्या नेतृत्वाखाली हा पायी मोर्चा काढण्यात आला. यावेळी बोलताना कवीश्वर यांनी, पावसाळी पर्यटन काळात बंदी आदेश पारित केल्याने स्थानिक व्यावसायिकांना मोठ्या नुकसानाला सामोरे जावं लागत आहे. त्यामुळे बंदी आदेश मागे नाही घेतला तर तीव्र आंदोलन करण्याचा इशारा प्रशासनाला दिला.
अधिक वाचा –
– आमदार सुनिल शेळके यांनी घेतली ‘तालुकास्तरीय आढावा बैठक’, ग्रामस्थांनी वाचला तक्रारींचा पाढा
– पॅरिस ऑलिंपिक 2024 मध्ये भारतासाठी पहिले पदक जिंकणाऱ्या ‘मनु भाकर’वर अभिनंदनाचा वर्षाव । Manu Bhaker
– पुणे जिल्ह्यातील धरणांची सद्यस्थिती काय, कोणत्या धरणात किती टक्के पाणीसाठा? वाचा एका क्लिकवर । Pune News