Dainik Maval News : तळेगाव-चाकण रस्त्यावर पायी जात असलेल्या एका ज्येष्ठ महिलेला पत्ता विचारण्याच्या बहाण्याने थांबवून तिच्या गळ्यातील सोन्याचे दागिने लुटणाऱ्या चोरट्यांना तळेगाव एमआयडीसी पोलिसांनी मुद्देमालासह अटक केली आहे.
22 फेब्रुवारी रोजी श्रीमती नलिनी ओंकार गायकवाड (वय 65, रा. जांबे, ता. मुळशी, जि. पुणे) या माळवाडी (ता. मावळ) येथे आपल्या नातेवाईकांना भेटण्यासाठी आल्या होत्या. त्या तळेगाव-चाकण रस्त्यावरून पायी जात असताना, दोन युवकांनी त्यांना थांबवले आणि पत्ता विचारण्याच्या बहाण्याने संभाषणात गुंतवले.
- संभाषणाच्या दरम्यान, चोरट्यांनी त्यांच्या गळ्यातील सुमारे 90,000 रुपये किमतीचे सोन्याचे डोरले हिसकावून पळ काढला. घटनेनंतर श्रीमती गायकवाड यांनी तळेगाव एमआयडीसी पोलीस ठाण्यात तक्रार दाखल केली. त्यानुसार, डी.बी. पथकाचे पोलीस हेड कॉन्स्टेबल अनंत रावण यांनी तपास सुरू केला.
तपासादरम्यान, पोलिसांना माहिती मिळाली की, अशाच स्वरूपाचे गुन्हे करणारे काही संशयित आळेफाटा येथे आढळले आहेत. या माहितीच्या आधारे पोलिसांनी अधिक तपास करून सुरज हसमुखभाई राजपूत, राहूल हसमुखभाई राजपूत, हरी गंगाराम बावरी राठोड आणि बबलू बिरचंद सोलंकी (सर्व राहणार गुजरात) यांना अटक केली.
- चौकशीदरम्यान, त्यांनी गुन्ह्याची कबुली दिली आणि पोलिसांनी लुटलेले सोन्याचे डोरले हस्तगत केले. ही कारवाई पोलीस उपनिरीक्षक विवेक गोवारकर, हेड कॉन्स्टेबल अनंत रावण, सुरेश जाधव, नाईक ज्ञानेश्‍वर सातकर, पोलीस कॉन्स्टेबल भीमराव खिलारे, विनायक शेरमाळे, स्वराज साठे, रमेश घुले आणि रोशन पगारे यांच्या ‘पथकाने केली.
तळेगाव एमआयडीसी पोलिसांनी वेगवान तपास करून अवघ्या काही दिवसांत आरोपींना अटक केली आणि सोन्याचे दागिने परत मिळवले. या घटनेमुळे नागरिकांनी अशा प्रकारच्या फसवणुकीपासून सावध राहण्याची गरज आहे. पोलीस तपास सुरू असून, आरोपींनी याआधीही असे गुन्हे केले आहेत का, याचा शोध घेतला जात आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– तळेगाव दाभाडे नगरपरिषदेच्या अभ्यासिकेत अभ्यास केलेले चार विद्यार्थी बनले अधिकारी ; मुख्याधिकाऱ्यांनी केला सन्मान । Talegaon Dabhade
– देहू नगरपंचायतीला यात्रा अनुदान कधी मिळणार? नागरिकांच्या मिळकत करातून होतोय कोट्यवधीचा खर्च । Dehu News
– पिंपरी-चिंचवड शहरासाठी मुळशी धरणातील पाणी आरक्षणाची मागणी ; मुख्यमंत्री व जलसंपदा मंत्र्यांना निवेदन
