Dainik Maval News : मावळ तालुक्यातील पवन मावळ विभागातील शिळींब ते चावसर रस्त्यालगत चावसर गावच्या हद्दीत एका अज्ञात व्यक्तीचा मृतदेह पुरलेल्या अवस्थेत आढळून आल्याने परिसरात एकच खळबळ माजली आहे. याप्रकरणी अज्ञात आरोपीविरुद्ध खून आणि पुरावे नष्ट करण्याचा प्रयत्न केल्याचा गुन्हा दाखल करण्यात आला आहे.
ही घटना ३ मे रोजी उघडकीस आली. सदर मृतदेह मौजे चावसर गावातील गट क्रमांक ३४३ मधील जमिनीत सापडला आहे. चावसर-शिळींब रस्त्याच्या कडेला जेसीबीच्या सहाय्याने खड्डा खोदून मृतदेह अर्धवट पुरण्यात आला होता, अशी प्रथम दर्शनी माहिती आहे.
घटनेची माहिती मिळताच चावसर गावचे पोलीस पाटील गोणते यांनी लोणावळा ग्रामीण पोलीस ठाण्यात खबर दिली, त्यानंतर पोलिसही घटनास्थळी दाखल झाले. पंचनामा करून पुरलेला मृतदेह बाहेर काढून शवविच्छेदनासाठी पाठवण्यात आला.
मृतास अंदाजे चार पाच दिवसांपूर्वी पूरलेले असल्याने त्याचे शरीर सडलेल्या अवस्थेत असून ओळख अद्याप पटलेली नाही. अंदाजे ३५ ते ४० वर्षांचा पुरुष असून डोक्याला गंभीर मार झाल्याचे प्रथमदर्शनी निरीक्षणातून स्पष्ट झाले आहे. कुणीतरी अज्ञात कारणासाठी आणि अज्ञात हत्याराने हत्या केल्याचा पोलिसांचा अंदाज आहे.
आरोपीने खून केल्यानंतर मृतदेह लपवण्यासाठी जमिनीत पुरल्याचा संशय आहे. याप्रकरणी लोणावळा ग्रामीण पोलीस ठाण्यात गुन्हा दाखल असून, पुढील तपास पोलीस निरीक्षकांच्या मार्गदर्शनाखाली सुरू आहे.
अधिक वाचा –
– मावळ तालुक्याचा बारावीचा निकाल ९५.१० टक्के, यंदाही मुलींचीच बाजी, १२ कॉलेजचा निकाल शंभर टक्के । Maharashtra HSC 12th Result 2025
– ‘दैनिक मावळ’ संवाद : ज्येष्ठ नाट्यकलाकार व नाट्यप्रशिक्षक प्रकाश पारखी यांच्याशी खास बातचीत । Drama instructor Prakash Parkhi
– पुणे-लोणावळा तिसर्या-चौथ्या मार्गिकेचे काम वेगाने पुढे जाणार, रेल्वेकडून डीपीआर तयार ; केंद्रीय रेल्वे मंत्री अश्विनी वैष्णव यांची माहिती
