Dainik Maval News : मावळ तालुक्यासह संपूर्ण पुणे जिल्ह्यात मागील दोन तीन दिवसांपासून मुसळधार पाऊस बरसत आहे. मुसळधार पावसाने मावळ तालुक्यातील नदी, नाले, ओढ्यांना पूर आला असून अनेक ठिकाणी जनजीवन विस्कळीत झाले आहे. डोंगराळ भाग असलेल्या पवन मावळ परिसरात तर पावसाचा जोर अधिक आहे.
मळवंडी ठुले धरण शंभर टक्के भरले
सततच्या पावसामुळे पवन मावळ विभागातील मळवंडी ठुले हे धरण १०० टक्के भरले असल्याची माहिती कार्यकारी अभियंता, खडकवासला पाटबंधारे विभाग यांच्याकडून देण्यात आली. गुरुवारी (दि. १९) सकाळीच हे धरण शंभर टक्के भरले असून धरणात ३.६९ द.ल.घ.मी पाणीसाठा आहे. सदर तलाव द्वारविरहित म्हणजे गेट नसलेला आहे. त्यामुळे धरण भरल्याने कोथूर्णे ओढ्याद्वारे पवना नदीमध्ये अनियंत्रित विसर्ग सुरु झालेला आहे. यामुळे वारू, कोथूर्णे, ब्राह्मणोली, काले गावांना सतर्कतेचा इशारा देण्यात आला आहे.
पवना धरण चाळीस टक्क्यांवर
मावळ तालुक्यातील प्रमुख पवना धरण परिसरात पावसाचा जोर वाढला आहे. शुक्रवारी सकाळी सहा वाजता घेतलेल्या नोंदीनुसार धरण परिसरात चोवीस तासात तब्बल ११९ मि.मी. इतका पाऊस झाला आहे. सततच्या पावसामुळे धरणाच्या पाणीपातळीत कमालीची वाढ झाली आहे. जूनच्या पहिल्या आठवड्यात पाऊस ओसरल्यानंतर २९-३० टक्क्यांवरील पाणीसाठा पुन्हा २६ टक्क्यांपर्यंत खालावला होता. परंतु चालू आठवड्यात झालेल्या पावसाने पवना धरणातील पाणीपातळी वाढली आहे. सद्यस्थिती पवना धरणात ४०.४४ टक्के इतका पाणीसाठा असल्याची माहिती धरण विभागाचे रजनीश बारिया यांनी दिली.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– महत्वाची बातमी : आषाढी वारी पालखी सोहळ्याच्या अनुषंगाने पुणे जिल्ह्यातील वाहतूक मार्गात मोठे बदल – लगेच चेक करा
– धोकादायक पर्यटनस्थळे तात्पुरती बंद ठेवा, पर्यटकांच्या सुरक्षेला प्राधान्य द्या ; राज्याच्या मुख्य सचिवांचे निर्देश
– PHOTO : विठ्ठलाच्या भेटीला जगद्गुरू निघाले… देहूनगरीतून तुकोबारायांच्या पालखीचे पंढरपूरकडे प्रस्थान; पहिला मुक्काम इनामदार वाड्यात
