Dainik Maval News : लोणावळ्यात सध्या पावसाळी पर्यटनाचा हंगाम सुरू आहे. यामुळे पर्यटकांची गर्दी विशेष वाढली आहे. अशावेळी विविध दुकानांमध्ये खरेदीसाठी मोठी वर्दळ असतानाच काही समाजकंटक गर्दीचा गैरफायदा घेऊन दुकानदारांना बनावट पेमेंट स्क्रीनशॉट दाखवून फसविण्याचा प्रयत्न करत आहेत. दरम्यान बुधवारी असाच एक प्रकार होत असताना एका सतर्क दुकानदाराच्या प्रसंगावधानामुळे फसवणुकीचा मोठा प्रयत्न उधळण्यात आला आहे.
कुमार चौकातील वीके वाईन शॉपमध्ये एका व्यक्तीने खरेदी केली आणि त्यानंतर खोटा यूपीआय पेमेंट (UPI PAYMENT) स्क्रीनशॉट दाखवून पैसे भरल्याचा बनाव केला. दुकानदाराने नेहमीप्रमाणे खात्यात रक्कम जमा झाली आहे की नाही, हे तपासले. रक्कम जमा झाली नसल्याचे लक्षात येताच दुकानदाराने तत्काळ त्या व्यक्तीला थांबवले आणि कुमार चौकीत तैनात असलेल्या पोलीस हवालदाराकडे सोपविले.
पोलिसांनी केलेल्या सखोल चौकशीदरम्यान, संबंधित व्यक्तीने बनावट स्क्रीनशॉट तयार करण्याची संपूर्ण प्रक्रिया प्रत्यक्ष करून दाखवली. या घटनेमुळे लोणावळ्यातील दुकानदार हादरले असून त्यांनी आता अधिक सतर्क राहण्याचे ठरवले आहे. पोलिसांनीही सर्व दुकानदारांना अशा फसवणुकीपासून सावध राहण्याचे आणि प्रत्येक व्यवहाराची खात्री करून घेण्याचे आवाहन केले आहे.
लोणावळ्यात पर्यटनाचा बहर असतानाच फसवणुकीचे असे प्रकार वाढू लागल्याने स्थानिक व्यावसायिकांमध्ये चिंतेचे वातावरण निर्माण झाले आहे. नागरिकांनी आणि दुकानदारांनी अशा सायबर गुन्हेगारांपासून सावध राहावे, असे आवाहन करण्यात येत आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– पावसाळ्यात फिरायला जायचंय? पुणे जिल्ह्यातील मावळ तालुका म्हणजे पावसाळ्यात स्वर्गच, ‘या’ ठिकाणांना नक्की भेट द्या
– महाराष्ट्र शक्तीपीठ महामार्गाला गती ! २० हजार ७८७ कोटींची तरतूद ; बारा जिल्ह्यांना जोडणारा ८०२ कि.मी. लांबीचा द्रुतगती मार्ग
– मावळ लोकसभा क्षेत्रातील पनवेल विमानतळ सप्टेंबरपासून सुरू होणार ; खासदार श्रीरंग बारणे यांची माहिती
– कार्यकर्ते हेच आमचे खरे बलस्थान, पुढील प्रत्येक निर्णय त्यांच्याच सल्ल्याने घेणार – आमदार सुनील शेळके
