Dainik Maval News : कार्ला (ता. मावळ) येथील श्री एकविरा देवस्थान ट्रस्टने आई श्री एकविरा देवीच्या दर्शनासाठी येणाऱ्या भाविकांसाठी ड्रेस कोड लागू करण्याचा निर्णय घेतला आहे. लाखो भक्तांचे श्रद्धास्थान आणि आग्री, कोळी समाजाचे कुलदैवत असलेल्या कुलस्वामिनी आई एकवीरा देवी मंदिरात येणाऱ्या भाविकांसाठी अर्थात महिला पुरुषांसाठी ७ जुलैपासून पोषाखाबाबत ही नियमावली लागू असणार आहे.
शुक्रवारी (27 जून) देवस्थान ट्रस्टची याबाबत बैठक संपन्न झाली. त्यात सर्व सदस्यांच्या एकमताने हा निर्णय घेण्यात आला. या निर्णयानुसार, मंदिरात येणाऱ्या भाविकांनी भारतीय पारंपरिक पोशाख परिधान करावा, असे स्पष्ट करण्यात आले आहे. देवस्थान ट्रस्टच्या निर्णयानुसार हा ड्रेस कोड 7 जुलै 2025 पासून प्रत्यक्षात येणार आहे.
ड्रेस कोडचे नियम पुढीलप्रमाणे असतील –
महिलांसाठी : साडी, सलवार-कुर्ता किंवा अन्य भारतीय पारंपरिक पोशाख
पुरुषांसाठी : धोतर-कुर्ता पायजमा कुर्ता, पँट-शर्ट किंवा पारंपरिक वेशभूषा
या पोषाखास बंदी –
मंदिरात येताना वेस्टर्न ड्रेस, शॉर्ट्स, मिनी स्कर्ट्स, हाफ पँट्स, फाटलेली जीन्स यांसारखे पोशाख वर्ज्य करण्यात आले आहेत.
ड्रेस कोड बाबत घेण्यात आलेल्या बैठकीस ट्रस्टचे अध्यक्ष दीपक हुलावळे, प्रमुख विश्वस्त खासदार सुरेश उर्फ बाळ्या मामा म्हात्रे, उपाध्यक्ष सागर देवकर, सचिव नवनाथ देशमुख, सहसचिव महेंद्र देशमुख, सहखजिनदार विकास पडवळ तसेच विश्वस्त पूजा अशोक पडवळ आदी पदाधिकारी बैठकीला उपस्थित होते.
मंदिरातील धार्मिक वातावरणाची पवित्रता टिकवण्यासाठी आणि पारंपरिक मूल्यांना सन्मान देण्यासाठी हा निर्णय घेण्यात आल्याचे ट्रस्टच्या वतीने सांगण्यात आले आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– तळेगाव एमआयडीसी औद्योगिक क्षेत्र भयमुक्त राहण्यासाठी पोलीस कटिबद्ध ; पोलीस आयुक्त विनयकुमार चौबे यांचे आश्वासन
– आषाढी यात्रेसाठी ५ हजार २०० विशेष बस सोडणार ; ग्रुप बुकींग असल्यास कोणत्याही गावातून थेट पंढरपूरपर्यंत एसटी मिळणार
– Jeevan Bhalerao : परदेशातून पदवी घेत आईवडिलांचे स्वप्न केले साकार; हिंजवडी येथील ‘जीवन’चा कुंभार समाजातील युवकांपुढे नवा आदर्श
