अजित पवारांचा मोठा निर्णय ! एक दोन नव्हे तर तीन जिल्हाध्यक्षांची नियुक्ती ; पुणे जिल्हा परिषद ताब्यात ठेवण्यासाठी मास्टर प्लॅन

Dainik Maval News : राष्ट्रवादी काँग्रेस पार्टी (अजित पवार) पक्षाचे माजी जिल्हाध्यक्ष प्रदीप गारटकर यांनी इंदापूर नगरपरिषदेच्या नगराध्यक्षपदाची निवडणूक लढवण्यासाठी थेट पक्षाच्या सदस्यत्वासह जिल्हाध्यक्षपदाचा राजीनामा दिला होता. निवडणूक झाल्यानंतर प्रदीप गारटकर पुन्हा अजित पवारांशी जुळवून घेतील, अशी चर्चा होती. परंतु आता त्यांच्या भाजपा प्रवेशाच्या चर्चा सुरू झाल्या आहेत. अशात अजित पवार यांनी आज एक मोठा निर्णय घेतला आहे.

आगामी पुणे जिल्हा परिषद निवडणुकीच्या पार्श्वभूमीवर अजित पवार यांनी संघटनात्मक पातळीवर महत्वाच्या नियुक्त्या केल्या आहेत. गेली अनेक वर्षे पुणे जिल्हा परिषदेवर राष्ट्रवादी काँग्रेस पक्षाची सत्ता आहे. हीच सत्ता आगामी काळातही अबाधित राखण्यासाठी अजित पवारांनी मास्टर प्लॅन बनविला असून त्याअंतर्गत आता पुणे जिल्ह्यात पक्षाचे एक दोन नव्हे तर तीन जिल्हाध्यक्ष नियुक्त करण्यात आले आहेत.

संभाजी होळकर – बारामती, इंदापूर, पुरंदर आणि दौंड या तालुक्यांची जबाबदारी संभाजी नाना होळकर यांच्याकडे देण्यात आली आहे. होळकर हे अनेक वर्षांपासून पक्ष संघटनेत काम करीत असून पक्षफुटीच्या काळातही ते अजित पवारांसोबत राहिले. जवळपास तेरा वर्षांहून अधिक काळ होळकर हे बारामती तालुकाध्यक्ष म्हणून काम पाहत होते.

राजेंद्र कोरेकर – शिरूर, जुन्नर, खेड आणि आंबेगाव या तालुक्यांची जबाबदारी राजेंद्र कोरेकर यांच्यावर सोपविण्यात आली आहे. अजित पवार यांचे खंदे समर्थक आणि पक्ष संघटनेत सक्रीय कार्य करणारा नेता नव्हे कार्यकर्ता अशी त्यांची ओळख आहे.

विठ्ठलराव शिंदे – राजगड, भोर, मुळशी आणि मावळ या तालुक्यांची जबाबदारी विठ्ठलराव शिंदे यांच्यावर सोपविण्यात आली आहे. राष्ट्रवादी काँग्रेसचे माजी तालुकाध्यक्ष, अजित पवार आणि आमदार सुनील शेळके यांचे विश्वासू असलेले विठ्ठलराव शिंदे हे राष्ट्रवादी काँग्रेसचे जुणे जाणते नेतृत्व आहे.

संभाजी होळकर, राजेंद्र कोरेकर आणि विठ्ठलराव शिंदे या तिघांवर तालुका विभागून पुणे ग्रामीण जिल्हाध्यक्ष पदांची जबाबदारी देण्यात आली आहे. आगामी जिल्हा परिषद आणि पंचायत समिती निवडणुका आणि पक्ष संघटनेची जबाबदारी या तिघांवर असणार आहे.

( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा –
– वडगाव नगरपंचायतीच्या पाणीपुरवठा समिती सभापतीपदी सुनील ढोरे ; आमदार सुनील शेळके यांच्याकडून घोषणा
– काँग्रेसचे ज्येष्ठ नेते सुरेश कलमाडी यांचे निधन ; भारतीय हवाई दलात पायलट ते केंद्रीय मंत्री, अशी होती कलमाडी यांची कारकीर्द
– श्रीक्षेत्र भंडारा डोंगर येथे २३ जानेवारीपासून भव्य गाथा व ज्ञानेश्वरी पारायण आणि कीर्तन महोत्सवाचे आयोजन ; कार्यक्रमाची जोरदार तयारी