Dainik Maval News : मावळ तालुक्यातील पवन मावळ विभागातील प्रमुख गाव असलेल्या मौजे शिळींब गावापर्यंत आता पीएमपीएमएल बससेवा सुरु झाली आहे. गेली अनेक वर्षांपासून स्थानिक युवकांकडून होत असलेली मागणी आणि आमदार सुनील शेळके यांनी केलेल्या सातत्यपूर्ण पाठपुराव्याला अखेर यश आले आहे.
बुधवारी (दि.११) सकाळी पहिल्यांदाच पीएमपीएमएल बस गावात पोहोचली आणि ग्रामस्थांना अत्यानंद झाला. ग्रामस्थांनी एकत्रित येत श्रीफळ वाढवून बसची पुजा केली. तसेच गावातील ज्येष्ठ नागरिकांच्या हस्ते बसचे चालक – वाहक यांचा सत्कार सन्मान करण्यात आला. याप्रसंगी गावातील नागरिक मोठ्या संख्येने उपस्थित होते.
शिळींब गाव हे पवन मावळातील प्रमुख आणि मोठी लोकसंख्या असलेले गाव आहे. शिळींब ग्रामपंचायत ही चार गावांची ग्रामपंचायत असून पंचक्रोशीतील अनेक गावांसाठी येथे प्राथमिक बाजारपेठ आहे. या परिसरातून मुळशी तालुका आणि पुढे पुणे शहराकडे जाणाऱ्या प्रवाशांची संख्या अधिक आहे, त्यामुळे थेट मार्केटयार्ड आणि पौड ते शिळींब अशी बससेवा सुरू झाल्यामुळे वाहतुकीचा मोठा प्रश्न मार्गी लागला आहे.
पवन मावळचा हा परिसर पर्यटनासाठी देशभरातील पर्यटकांचा आकर्षणाचा केंद्र आहे. अलीकडील काळात या भागात येणाऱ्या प्रमुख रस्त्यांचा विकास चांगल्या प्रकारे झाला. परंतु सार्वनिक वाहतूक सुविधा आवश्यकतेनुसार नव्हती. या बससेवेमुळे हा प्रश्न सुटला आहे. – अक्षय धनवे (अध्यक्ष – रा.काँ. शिळींब)
मुळशी भागात जाणारे कामगार, विद्यार्थी यांसह सामान्य प्रवाश्यांना बस सुविधा नसल्याने अडचणींचा सामना करावा लागत होता. परंतु पीएमपीएमएल बस सेवा उपलब्ध झाल्याने नागरिकांची अडचण दुर झाली आहे. – शिवाजी दरेकर (स्थानिक, शिळींब)
शिळींब ग्रामस्थ आणि परिसरातील नागरिकांनी केलेल्या मागणीनुसार पीएमपीएमएल प्रशासनाशी पत्रव्यवहार केला होता. त्यानुसार या भागातील नागरिकांची गरज लक्षात घेत ही बस सेवा सुरू करण्यात आली आहे. पवन मावळातील या परिसरातील नागरिकांना वाहतुकीसाठी हा नवीन पर्याय उपलब्ध झाला असून त्यातून परिसराच्या विकासाला हातभार लागेल. – आमदार सुनील शेळके, मावळ विधानसभा
मार्केटयार्ड-पौड-शिळींब बसचे वेळापत्रक
पहाटे 5.00 – मार्केटयार्ड ते शिळींब
सकाळी 7.30 – शिळींब ते पौड
सकाळी 9.15 – पौड ते शिळींब
सकाळी10.30 – शिळींब ते मार्केटयार्ड
दुपारी 2.15 – मार्केटयार्ड ते शिळींब
दुपारी 5.00 – शिळींब ते पौड
सायं 6.45 – पौड ते शिळींब
रात्री 8.00 – शिळींब ते मार्केटयार्ड
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– महाशिवरात्रीसाठी श्री भीमाशंकर मंदिर बंद राहणार ; भव्य सभामंडप उभारणीचे काम व परिसर विकासकामे वेगात सुरू
– लोणावळ्यात नाश्त्यासाठी थांबला अन् फेरफटका मारायला गेला.. प्रसिद्ध कलाकाराच्या एकुलत्या एक मुलाचा दुर्दैवी मृत्यू
– मावळ पंचायत समितीवर राष्ट्रवादी काँग्रेसचा झेंडा ; भाजपाची २५ वर्षांची सत्ता उलथवून टाकली
