Dainik Maval News : राष्ट्रवादी काँग्रेस पक्षाच्या बैठकीत पंचायत समिती मावळ च्या गटनेतेपदी इंदुरी गणातून निवडून आलेले दिलीप नामदेव ढोरे यांची एकमताने निवड करण्यात आली आहे. राष्ट्रवादी काँग्रेसच्या नवनिर्वाचित पंचायत समिती सदस्यांची बैठक राष्ट्रवादीचे तालुकाध्यक्ष गणेश खांडगे यांच्या उपस्थितीत पक्ष कार्यालयात पार पडली. या बैठकीत ढोरे यांच्या नावावर शिक्कामोर्तब झाले.
पक्षाचे दिवगंत नेते उपमुख्यमंत्री अजित पवार यांना श्रद्धांजली वाहून कामकाजास सुरुवात करण्यात आली. नवनिर्वाचित सदस्यांचे अभिनंदन करून पंचायत समितीच्या माध्यमातून ग्रामीण भागातील प्रश्नांना प्राधान्य देत विकासकामांना गती देण्याचा संकल्पही बैठकीत करण्यात आला.
बैठकीस पंचायत समिती सदस्य साहेबराव कारके, राजेंद्र कडलक, योगेश लोहर, समीर जाधव, सुनिता येवले, रेश्मा देवकर, शैला कालेकर, प्राची गायकवाड, आशा मोरमारे उपस्थित होते. आमदार सुनिल शेळके तसेच राष्ट्रवादी काँग्रेसचे तालुकाध्यक्ष गणेश खांडगे यांच्या मार्गदर्शनाखाली पंचायत समितीतील कामकाज अधिक गतिमान व लोकाभिमुख करण्याचा निर्धार ढोरे यांनी व्यक्त केला.
दिलीप ढोरे यांनी सहकार, कृषी व पंचायत राज अशा क्षेत्रात विविध पदांवर काम केले आहे. कडजाई माता नागरी सहकारी पतसंस्थेचे चेअरमन पद त्यांनी भूषविले. ते मावळ कृषी उत्पन्न बाजार समितीचे संचालक आहेत. मावळ तालुका राष्ट्रवादी काँग्रेस सहकार सेलचे अध्यक्ष म्हणून त्यांनी काम केले आहे. इंदोरी ग्रामपंचायतीचे सदस्य, उपसरपंच म्हणून त्यांची राजकीय कारकीर्द सुरू झाली होती.
निवडीनंतर बोलताना दिलीप ढोरे म्हणाले, “मावळ तालुक्यातील ग्रामीण भागातील पाणीपुरवठा, रस्ते, आरोग्य, शिक्षण आणि शेतकरीहिताचे प्रश्न प्राधान्याने सोडवण्यासाठी पंचायत समितीच्या माध्यमातून ठोस व वेळबद्ध निर्णय घेणार आहे. आमदार सुनील शेळके व राष्ट्रवादी काँग्रेसचे अध्यक्ष गणेश खांडगे यांच्या मार्गदर्शनाखाली सर्व सदस्यांना विश्वासात घेऊन पारदर्शक, लोकाभिमुख कारभार करण्याचा प्रयत्न करणार आहे.”
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– विद्यार्थ्यांसाठी शासनाच्या अनेक योजना, सर्व शाळांमध्ये प्रमुख योजनांची माहिती देणारे फलक प्रदर्शित केले जावे – शालेय शिक्षण मंत्री
– ड्रग्सच्या साखळीत सहभागी असणाऱ्यांवर मकोका अंतर्गत कारवाई , संबंधितांची मालमत्ता जप्त केली जाणार – मुख्यमंत्री
– श्रीक्षेत्र देहू येथे संत तुकाराम महाराज बीज सोहळ्यानिमित्त पाणी वापराबाबत प्रतिबंधात्मक आदेश लागू
– तळेगाव दाभाडेतील नागरिकांचे ‘हक्काच्या घराचे स्वप्न’ होणार साकार ; आमदार सुनील शेळके यांच्या पाठपुराव्याला मोठे यश
