Dainik Maval News : जुन्या पुणे-मुंबई महामार्गावर लोणावळा शहराजवळील प्रसिद्ध कार्ला लेणी व एकविरा मंदिराकडे जाण्यासाठीचे प्रवेशद्वार असलेल्या कार्ला फाटा येथील वाहतूक कोंडीची समस्या आता लवकरच सुटणार आहे. येथील वाहतूक कोंडी फोडण्यासाठी आणि सुरक्षेच्या दृष्टीने याठिकाणी नवीन उड्डाणपूल उभारण्यास महाराष्ट्र राज्य रस्ते विकास महामंडळ (एमएसआरडीसी)ने मान्यता दिली आहे.
याकरिता एकूण ९० कोटी ३२ लाख रुपयांचा निधी उपअभियंता राहुल पवार यांनी मंजूर केला आहे. या पुलासाठी मावळचे खासदार श्रीरंग बारणे आणि आमदार सुनील शेळके यांच्यासहीत स्थानिकांनी वारंवार केलेल्या पाठपुराव्याला मोठे यश आले आहे.
कार्ला फाटा येथे मोठी वाहतूक कोंडी होत होती. सुटीच्या दिवशी या कोंडीत भर पडते. सातत्याने छोटे-मोठे अपघात होत होते. त्यामुळे कार्ला फाटा येथे उड्डाणपूल उभारण्याची मागणी स्थानिक नागरिकांसहीत प्रवशांकडून वारंवार होत होती. याबाबत खासदार बारणे यांनीही उपमुख्यमंत्री तथा सार्वजनिक बांधकाम मंत्री एकनाथ शिंदे यांच्याकडे पाठपुरावा केला.
त्याला उपमुख्यमंत्री शिंदे यांनी सकारात्मक प्रतिसाद दिला. तसेच आई एकविरा देवीचे दर्शन घेण्यासाठी काही महिन्यांपूर्वी आलेल्या श्री शिंदे यांनी कार्ला फाटा येथे उड्डाणपूल उभारण्याची घोषणा केली होती. तसेच प्रकल्पासाठी सुमारे ४५ कोटी रुपयांचा निधी मंजूर केला होता.
याबाबत खासदार श्रीरंग बारणे म्हणाले, राज्यभरातून देवीच्या दर्शनासाठी भाविक कार्ला येथे येत असतात. पर्यटननगरी लोणावळ्याकडे जाणाऱ्या पर्यटकांचीही मोठी गर्दी असते. येथे अनेकदा अपघात होतात. वाहनांची मोठी गर्दी होते. रविवारी प्रचंड वाहतूक कोंडी होते. त्यामुळे उड्डाणपूल उभारण्याची नागरिकांची मागणी होती. त्यानुसार पूल उभारण्यासाठी सातत्याने पाठपुरावा केला.
आई एकविरा देवी येथील विविध विकास कामांच्या शुभारंभासाठी आल्यानंतर उपमुख्यमंत्री एकनाथ शिंदे यांनी उड्डाणपूल उभारण्याचा शब्द दिला होता. त्यानुसार उड्डाणपूल उभारण्यास मान्यता मिळाली आहे. यामुळे या भागात होणारी वाहनांची गर्दी कमी करण्यास या पुलामुळे मदत होणार आहे.
वाहतूक सुरळीत होईल. अपघातांचे प्रमाण घटेल. कार्ला लेणी, एकवीरा देवी मंदिर पर्यटकांना वाहतूक कोंडीला सामोरे लागणार नाही. या उड्डाणपूलासाठी ९० कोटी ३२ लाख रुपयांचा निधी एमएसआरडीसीने मंजूर केला आहे. आता लवकर निविदा प्रक्रिया राबवून कामाला सुरुवात होईल.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– इयत्ता चौथी आणि सातवीच्या शिष्यवृत्ती परीक्षेकरिता नोंदणी आणि आवेदनपत्र भरण्यासाठी मुदतवाढ ; ‘या’ तारखेपर्यंत भरता येणार अर्ज
– मावळ कृषी उत्पन्न बाजार समितीचे सभापती संभाजी शिंदे यांचा राजीनामा ! जिल्हा उपनिबंधक यांच्याकडे सोपविला राजीनामा
– वाहतूकीचे नियम मोडणारे, गाडीला काळ्या काचा – फॅन्सी नंबरप्लेट असलेल्या वाहन चालकांवर वडगाव मावळ पोलिसांची कारवाई
– पुणे – लोणावळा रेल्वे प्रवास होणार सुसाट.. प्रवाशांचा वेळ वाचणार ; रेल्वे विभागाचा मास्टर प्लॅन – वाचा सविस्तर
