दैनिक मावळ (प्रतिनिधी) : मावळ तालुक्यातील कान्हे येथील नवीन उपजिल्हा रुग्णालय मध्ये मूलभूत आरोग्य सुविधांचा अभाव असल्याचे समोर आले आहे. नव्याने उभारण्यात आलेल्या रुग्णालयाच्या इमारतीत परिसरातील नागरिकांना दर्जेदार वैद्यकीय सेवा मिळेल, अशी अपेक्षा होती. मात्र याठिकाणी इमारत जरी नवीन असली तरीही सुविधा मात्र जुन्याच रुग्णालयातील असल्याचे नागरिकांकडून सांगण्यात येत आहे. डॉक्टर, परिचारिका व इतर आरोग्य कर्मचाऱ्यांची कमतरता असल्याने रुग्णांना वेळेवर व दर्जेदार उपचार मिळत नसल्याची तक्रार इथे येणारे नागरिक, रुग्ण यांच्याकडून होत आहे.
रुग्णालयात तज्ज्ञ डॉक्टरांची पदे रिक्त असून उपलब्ध डॉक्टरांवर अतिरिक्त कामाचा ताण पडत आहे. कमी संख्येने नर्सेस, कर्मचारी यामुळे अनेक रुग्णांना प्राथमिक उपचारानंतर पुढील उपचारासाठी खासगी रुग्णालयांकडे किंवा मोठ्या रुग्णालयांकडे हलवावे लागत आहे. आपत्कालीन विभागातही आवश्यक त्या सुविधा पूर्ण क्षमतेने कार्यरत नसल्याची माहिती समोर आली आहे. याठिकाणी आयसीयू ची ही सुविधा सुरू नसल्याने नागरिकांना उपचारासाठी इतर ठिकाणी जावे लागत आहे.
तसेच, दंतचिकित्सा संदर्भात देखील उपचार होत नसल्याचे समोर आले असून, त्या ठिकाणी फक्त दात काढण्यासाठी सांगितले जात आहे. रूट कॅनल करणे याचेही साहित्य इथे पुरेसे उपलब्ध नाही, असे सांगून पुढे पाठविण्यात येत आहे. याच्या व्यतिरिक्त इतरही काही अत्यावश्यक वैद्यकीय उपकरणे व तपासणी यंत्रणा अपुरी असल्याने रुग्णांची गैरसोय होत आहे. औषधसाठा आणि प्रयोगशाळा सेवांमध्येही अडचणी निर्माण होत असल्याच्या तक्रारी आहेत.
मावळ तालुक्यातील आंदर मावळ व इतर ठिकाणी ग्रामीण भागातील नागरिकांसाठी हे रुग्णालय महत्त्वाचे केंद्र मानले जाते, मात्र सध्याच्या परिस्थितीत अपेक्षित दर्जाची सेवा मिळत नसल्याने नाराजी व्यक्त केली जात आहे. दरम्यान, स्थानिक नागरिकांनी संबंधित आरोग्य विभागाने तातडीने दखल घेऊन रिक्त पदे भरणे, आवश्यक उपकरणे उपलब्ध करून देणे आणि रुग्णालयातील सेवा सुरळीत कराव्यात, अशी मागणी केली आहे. वाढत्या लोकसंख्येच्या पार्श्वभूमीवर कान्हे उपजिल्हा रुग्णालय सक्षम करणे अत्यावश्यक असल्याचे मत व्यक्त होत आहे.
अपुरे मनुष्यबळ :
कान्हे येथे सुरू झालेले उपजिल्हा रुग्णालयामध्ये डॉक्टर व नर्सेस संख्याही अल्प प्रमाणात असल्याने तेथे उपचार घेण्यात आलेल्या नागरिकांची गैरसोय होत आहे. याचा परिणाम त्यांना खाजगी रुग्णालयात जाऊन उपचार घ्यावे लागत आहे. त्यामुळे त्यांना आर्थिक फटका बसत आहे
रक्त लघवी चेक करण्यासाठी गेलो असता आता तपासणीसाठी द्या, दोन दिवसांनी तुम्हाला रिपोर्ट मिळून जातील असे सांगितले. नाईलाजाने मला तिथून खासगी रुग्णालयात जावून उपचार घ्यावे लागले. हे रुग्णालय नक्की गोरगरिबांसाठी आहे की नाही, असा माझ्या मनात प्रश्न उपस्थित राहिला. तरी प्रशासनाने या रुग्णालयाकडे लक्ष देऊन गोरगरिबांना उपचार कसे मिळतील यासाठी प्रयत्न करावे. – गणेश चिखले, नागरिक, मावळ
ज्यावेळी मी सोनोग्राफी करण्यासाठी गेलो, त्यावेळी सांगण्यात आले की आठवड्यातले दोनच दिवस सोनोग्राफी केली जाते. सोमवार व बुधवार मी तिथे गेलो असता सोनोग्राफीसाठी लांबच लांब रांगा होत्या. त्यामुळे सोनोग्राफी करण्यासाठी दिवस जातो, अत्यावश्यक असणार असल्यास काही नागरिक रांगा पाहून पर्यायी खासगी हॉस्पिटलमध्ये जातात. तरी याकडे प्रशासनाने लक्ष देऊन या ठिकाणी सुविधा सुरळीत कराव्यात. किरण काजळे, नागरिक, मावळ
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मावळच्या निसर्गाचा विनाश थांबवा ! स्थानिक पर्यावरणमित्रांचे वीज प्रकल्पाविरोधात प्रशासनाला निवेदन ; तीव्र आंदोलनाचा इशारा
– आमदार सुनील शेळके यांच्या माध्यमातून शिळींब येथे आदिम सेवा अभियान अंतर्गत ९५ आदिवासी नागरिकांना जातीचे दाखले वाटप
– गॅस सिलिंडर वाहतूक करणाऱ्या टेम्पो चालकाच्या एका चुकीने ज्ञानेश्वरीने गमावला जीव ; सोमाटणे फाटा येथील मन सुन्न करणारी घटना
