Dainik Maval News : गॅस सिलिंडरची वाहतूक करणाऱ्या टेम्पोचा ‘हँडब्रेक’ लावण्यास चालक विसरल्याने, उतारावर असलेला टेम्पो अचानक मागे सरकला आणि या दुर्घटनेत टेम्पोखाली चिरडून ११ वर्षीय मुलीचा मृत्यू झाला. ही घटना सोमवारी (१६ मार्च) दुपारी साडेचारच्या सुमारास सोमाटणे फाटा (ता. मावळ) परिसरात घडली.
ज्ञानेश्वरी मुऱ्हे (११) असे मृत्यू झालेल्या चिमुरडीचे नाव आहे. पोलिसांनी दिलेल्या माहितीनुसार, सोमाटणे फाटा परिसरात गॅस सिलिंडरची वाहतूक करणारा टेम्पो उतारावर उभा करण्यात आला होता. मात्र चालकाने टेम्पोचा ‘हँडब्रेक’ व्यवस्थित लावला नाही. त्यामुळे काही वेळातच टेम्पो अचानक मागे सरकू लागला. त्यावेळी ज्ञानेश्वरी ही परिसरातील इतर मुलांसोबत रस्त्यालगत खेळत होती.
टेम्पो अचानक मागे येत असल्याचे लक्षात येण्यापूर्वीच ती टेम्पोच्या चाकाखाली आली. या भीषण अपघातात ती गंभीर जखमी झाली. स्थानिक नागरिकांनी तातडीने तिला जवळच्या रुग्णालयात उपचारासाठी नेले. मात्र, डॉक्टरांनी तिला मृत घोषित केले.
या घटनेची माहिती मिळताच परिसरातील नागरिक मोठ्या संख्येने घटनास्थळी जमा झाले. चालकाच्या निष्काळजीपणामुळे चिमुरडीचा जीव गेल्याचा आरोप करून स्थानिकांनी तीव्र संताप व्यक्त केला. संबंधित चालकावर कठोर कारवाई करावी, अशी मागणी नागरिकांनी केली.
दरम्यान, पोलिसांनी घटनास्थळी धाव घेऊन परिस्थिती नियंत्रणात आणली. या प्रकरणी संबंधित चालकाविरुद्ध गुन्हा दाखल करण्याची प्रक्रिया सुरू असल्याची माहिती वरिष्ठ निरीक्षक कन्हैया थोरात यांनी दिली.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा :
– गुडन्यूज ! प्रधानमंत्री किसान सन्मान निधीचा २२ वा हप्ता वितरित, महाराष्ट्रातील ९१ लाख शेतकऱ्यांना १ हजार ८३७ कोटींचे वितरण
– राज्य शासनाने अर्थसंकल्पात केलेल्या भरीव तरतुदीनंतर पुणे-लोणावळा लोहमार्गाच्या तिसऱ्या आणि चौथ्या ट्रॅकला रेल्वे मंत्रालयाने गती देण्याची मागणी
– मावळात काळ्या काचा अन् फॅन्सी नंबर प्लेट असलेल्या वाहनांची संख्या वाढली ; एलईडी दिव्यांमुळे होताहेत अपघात
