Dainik Maval News : मावळ तालुक्यात चारचाकी वाहने वापरणाऱ्या नागरिकांची संख्या वाढली आहे. परंतु चारचाकी वाहन खरेदीनंतर आपले वाहने इतरांपेक्षा वेगळे दिसावे किंवा ते खास असावे असे वाटणाऱ्या नागरिकांकडून वाहन मॉडिफाय केले जाते. अशावेळी वाहनांना काळ्या काचा लावणे, तसेच फॅन्सी नंबर प्लेट लावणे असे प्रकार केले जातात. मावळात सध्या काळ्या काचा लावलेल्या आणि फॅन्सी नंबर प्लेट असलेल्या वाहनांची संख्या वाढलेली दिसते.
काळ्या काचा असणाऱ्या वाहनांतून गुन्हेगार देखील मोकाट फिरतात. त्यामुळे गुन्ह्यांत फायदेशीर ठरणाऱ्या अशा काळ्या काचाच्या वाहनांवर आणि चालक / मालकांवर कारवाई करण्याची गरज आहे. तसेच पोलिसांचेही काळ्या काचा असलेल्या वाहनांकडे आणि फॅन्सी नंबर प्लेट लावलेल्या वाहनांकडे दूर्लक्ष होत असलेले दिसते.
आपले वाहन इतरांपेक्षा वेगळे आणि खास दिसावे यासाठी कार मालक काळ्या फिल्म लावून काचा काळ्या करणे, हेडलाइट्समध्ये एलईडी दिवे बसविणे, फॅन्सी नंबर प्लेट बनविणे असे उद्योग करतात. ह्या गोष्टी संबंधितास आनंद देऊन जात असतील, परंतु, ते इतरांसाठी धोकादायक ठरत आहेत. त्यामुळे प्रशासनाने या दिव्यांच्या विक्रीवर बंदी घालावी, नियमांचे उल्लंघन करणाऱ्या वाहनचालकांवर दंडात्मक, कठोर कारवाई करण्याची मागणी होत आहे.
मावळ तालुक्यातील काही व्यक्ती एलईडी दिवे आपल्या वाहनांमध्ये बसवून रुबाबात मिरवत आहेत. मात्र, याच गाड्या रात्रीच्या वेळी समोर आल्यानंतर इतर वाहनचालकांचे डोळे यामुळे दीपत आहेत. या दिव्यांमुळे आपली वाहने एका बाजूला घेऊन थांबवावी लागत आहे. परिणामी, हेच एलईडी दिवे अपघाताचे निमंत्रण देणारे ठरत आहे.
काही जण चारचाकी गाडीच्या काचेला पूर्णपणे काळ्या फिल्म लावत आहेत. त्यामुळे काचांमागे गैरप्रकारांची शक्यता नाकारता येत नाही. काळ्या फिल्म लावण्यावर न्यायालयाने बंदी घातली असली, तरी नियम मोडून अथवा शासनाचे आदेश डावलून मावळात असे प्रकार सुरू आहेत. रस्त्यांवर व बाजारपेठांमध्ये काळ्या काचाची वाहने सरार्सपणे रुबाबात मिरवताना अनेक चालक मोठ्या प्रमाणात दिसत आहे.
जीवघेणे ठरणारे हे एलईडी दिवे वाहतूक पोलिसांनी बंद करायला हवेत. शासनाचे काही निर्बंध असले, तरीही या दिव्यांची सर्रासपणे विक्री सुरू आहे. विक्रेत्यांवर कारवाया झाल्या तर ही जीवघेणी फॅशन कमी होताना दिसेल.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– महाराष्ट्राचे २२ वे राज्यपाल म्हणून जिष्णू देव वर्मा यांनी घेतली शपथ ; राजघराण्यातील व्यक्ती, कवी – लेखक अन् राजकारणी, जाणून घ्या नवीन राज्यपालांबद्दल
– ESMA Act : मोठी बातमी ! घरगुती गॅस सिलिंडर बुकिंगबाबत नियम बदलले , देशभरात ‘एस्मा’ लागू
– मोठी बातमी ! राज्यात 9 मार्चपासून नवीन ऑटो रिक्षांना परवाना देण्यास स्थगिती
– मावळ पंचायत समिती सभापती पदी सुनीता येवले आणि उपसभापती पदी साहेबराव कारके यांची बिनविरोध निवड
