Dainik Maval News : झोपडपट्टी दादा प्रतिबंधक कायद्यान्वये (एमपीडीए) कारवाई केल्यानंतर फरार झालेल्या गुंडाला वारजे माळवाडी पाेलिसांनी लोणावळा शहरातून अटक केली आहे. अभिजीत उर्फ चोख्या तुकाराम येळवंडे (वय २४, रा. कर्वेनगर) असे अटक केलेल्या गुंडाचे नाव आहे. त्याच्याविरूद्ध गंभीर स्वरूपाचे गुन्हे वारजे माळवाडी पोलीस ठाण्यात दाखल आहेत.
पोलीय आयुक्त अमितेशकुमार यांनी आरोपी येळवंडे याच्याविरूद्ध एमपीडीए कायद्यान्वये कारवाई केली होती. कारवाईनंतर त्याला नाशिक कारागृहात स्थानबद्ध करण्याचे आदेश दिले होते. कारवाईची माहिती मिळाल्यानंतर येळवंड पसार झाला होता. गुन्हे शाखा, तसेच वारजे माळवाडी पोलिसांच्या नजरेत येऊ नये म्हणून तो राहण्याची ठिकाणे बदलत होता.
परिमंडळ तीनचे पोलीस उपायुक्त संभाजी कदम यांनी वरिष्ठ पोलीस निरीक्षक विश्वजीत काईंगडे यांना आरोपीचा शोध घेण्याचे आदेश दिले. उपनिरीक्षक संजय नरळे आणि तपास पथक येळवंडेच्या मागावर होते. तो लोणावळ्यात असल्याची माहिती तपास पथकाला मिळाली. त्यानंतर पोलिसांच्या पथकाने त्याला ताब्यात घेतले.
पोलीस उपायुक्त संभाजी कदम, सहायक आयुक्त भाउसाहेब पठारे यांच्या मार्गदर्शनाखाली पोलीस निरीक्षक विश्वजीत काईंगडे, गुन्हे शाखेचे पोलीस निरीक्षक नीलेश बडाख, साळुंखे, योगेश वाघ, शरद पोळ, सागर कुंभार, प्रशांत चव्हाण, रियाज शेख, विजय खिलारी, किरण तळेकर यांनी ही कामगिरी केली.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मावळ तालुक्यातील पुणे ग्रामीण पोलीस दलाची ठाणी पिंपरी-चिंचवड आयुक्तालयाला जोडण्यास विरोध । Maval News
– लोणावळ्यात अवजड वाहन चालकांवर दंडात्मक कारवाई, दोन दिवसांत साडेचार लाखांचा दंड वसूल । Lonavala News
– जमीन मोजणीसाठी जीआयएस तंत्रज्ञानावर आधारित ई-मोजणी राज्यात लागू करण्यात येणार
