Dainik Maval News : मावळ तालुक्यात सामाजिक कार्यात सक्रीय असलेले बाळासाहेब लक्ष्मण घोटकुले यांच्या समाजकार्याची दखल घेत त्यांना ‘मेजर ध्यानचंद महाराष्ट्र क्रीडारत्न पुरस्कार २०२६’ जाहीर करण्यात आला आहे. सामाजिक क्षेत्रातील उल्लेखनीय योगदानाबद्दल त्यांची या पुरस्कारासाठी निवड करण्यात आली आहे.
हॉकी लिजेंड, पद्मभूषण मेजर ध्यानचंद क्रीडा पुरस्कार समिती आणि कालीरामण फाउंडशन इंडिया यांच्या वतीने देण्यात येणाऱ्या या पुरस्कारासाठी बाळासाहेब घोटकुले यांची ‘सामाजिक (समाजरत्न)’ या प्रवर्गातून निवड झाली आहे.
बाळासाहेब घोटकुले हे मावळ तालुक्यातील सामाजिक, राजकीय आणि सार्वजनिक उपक्रमांमध्ये सातत्याने सक्रिय राहिले आहेत. युवकांशी असलेला त्यांचा संपर्क, विविध सामाजिक उपक्रमांमधील सहभाग आणि स्थानिक पातळीवर नागरिकांच्या प्रश्नांसाठी केलेले काम यामुळे त्यांनी आपली स्वतंत्र ओळख निर्माण केली आहे. याच सामाजिक बांधिलकीची दखल घेत त्यांना ‘समाजरत्न’ प्रवर्गातील क्रीडारत्न पुरस्कारासाठी निवडण्यात आले आहे. त्यामुळे हा पुरस्कार केवळ व्यक्तीचा सन्मान नसून मावळच्या सामाजिक कार्याचीही दखल मानली जात आहे.
मेजर ध्यानचंद यांच्या जयंतीनिमित्त देशभर साजरा होणाऱ्या राष्ट्रीय क्रीडा दिनाचे औचित्य साधून विविध क्षेत्रांत उल्लेखनीय कामगिरी करणाऱ्या व्यक्तींचा सन्मान करण्याचे आयोजन करण्यात आले आहे. क्रीडा क्षेत्रासोबतच कला, सामाजिक, शैक्षणिक आणि औद्योगिक क्षेत्रात उल्लेखनीय योगदान देणाऱ्या व्यक्तींनाही पुरस्कार देण्यात येणार आहेत. या पुरस्कार सोहळ्यासाठी समितीचे प्रमुख प्रा. नितीन शिंदे, सर्वोच्च न्यायालयातील अधिवक्ता सुरेंद्र कालीरामण तसेच आशियाई सुवर्णपदक विजेते प्रा. प्र. अमोल साठे यांसह विविध मान्यवरांची उपस्थिती राहणार आहे.
मावळमध्ये सामाजिक कामातून उभे राहिलेल्या बाळासाहेब घोटकुले यांच्या कार्याला या पुरस्काराच्या माध्यमातून व्यापक स्तरावर मान्यता मिळत असल्याची भावना त्यांच्या समर्थकांकडून व्यक्त होत आहे. विशेषतः युवक आणि सामाजिक क्षेत्रात काम करणाऱ्या कार्यकर्त्यांसाठी हा सन्मान प्रेरणादायी ठरणार आहे. दरम्यान, पुरस्कार जाहीर झाल्यानंतर मावळ तालुक्यातील विविध स्तरातून बाळासाहेब घोटकुले यांचे अभिनंदन होत आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा
– लोणावळ्यातील पूरग्रस्तांच्या मदतीसाठी टाटा कंपनीचे अधिकारी, जिल्हाधिकारी आणि आमदार सुनील शेळके यांच्या उपस्थितीत महत्त्वपूर्ण बैठक
– कार्ला फाट्याजवळील वाकसई गावाच्या हद्दीत भीषण अपघात ; भरधाव कार थेट ओढ्यात कोसळली, दोघांचा मृत्यू
– मावळकरांचा लाडका ‘ओम्या’ काळाच्या पडद्याआड ; बैलगाडाशौकीनांमध्ये दुःखाची लाट, ‘भारतकेसरी ओम्या’ बैलाचे निधन
– मावळ तालुक्यातील शासकीय आरोग्य व्यवस्थेचे तातडीने ऑडिट करा ; आरोग्याच्या प्रश्नावर भाजपा आक्रमक
