‘विजय शिवतारेंनी अजित पवारांची माफी मागावी नाहीतर…’, मावळ तालुका राष्ट्रवादी काँग्रेसची आक्रमक भूमिका

विजय शिवतारे यांनी अजित पवार यांची माफी मागावी अशी मागणी राष्ट्रवादी काँग्रेस पक्ष अजित पवार गटाचे तालुकाध्यक्ष गणेश खांडगे यांनी केली आहे. वडगाव मावळ येथे आज (दि. 20) राष्ट्रवादी काँग्रेस पक्षाच्या प्रमुख पदाधिकाऱ्यांनी पत्रकार परिषद घेत ही मागणी केलीये. विजय शिवतारे यांना बारामतीत उमेदवारी दिल्यास राज्यात शिवसेनेच्या उमेदवारांविरोधात काम करू असा थेट इशारा राष्ट्रवादीने शिंदे गटाला दिला आहे. मावळ तालुक्यात आधीच शिवसेना शिंदे गटाकडून विद्यमान खासदार श्रीरंग बारणे यांची उमेदवारी जाहीर झालीये, त्यामुळे शिवतारेंच्या भूमिकेचा मावळमध्ये फटका बसू शकतो. ( मावळ, पिंपरी-चिंचवड, पुणे परिसरातील ताज्या अपडेट्ससाठी दैनिक मावळचा व्हॉट्सअ‍ॅप चॅनेल जॉईन करा )

बारामती लोकसभा मतदारसंघात बंडखोरीच्या पवित्र्यात असलेल्या विजय शिवतारे यांना शांत करा. अन्यथा आम्ही मावळ लोकसभेत शिंदे गटाचे उमेदवार श्रीरंग बारणे यांचा प्रचार करणार नाही, अशी ठाम भुमिका राष्ट्रवादी पदाधिकाऱ्यांनी घेतलीये. त्यामुळे विजय शिवतारे यांनी बारामतीमधून उमेदवारी मागे न घेतल्यास लोकसभा निवडणुकीत मावळमधील राष्ट्रवादीचे कार्यकर्ते संजोग वाघेरे यांचा प्रचार करणार का, हेही पाहावे लागेल. एकूण या प्रकरणामुळे श्रीरंग बारणे यांची मात्र चांगलीच कोंडी झाली आहे. ( vijay shivtare should apologize to ajit pawar otherwise ncp will stop campaigning for shrirang barne )

पुरंदरचे माजी आमदार विजय शिवतारे यांच्याविरोधात मावळ तालुका अजित पवार गट आक्रमक झाला आहे. विजय शिवतारे यांनी उपमुख्यमंत्री अजित पवार यांची माफी मागावी, अशी मागणी अजित पवार गटाने केली आहे. शिवतारे यांचा मुंबईला जाणारा रस्ता हा मावळमधून जातो. वरिष्ठ पातळीवर जर शिवतारे यांना समज दिली गेली नाही, तर मावळ राष्ट्रवादी काँग्रेस अजित पवार गटाकडून मावळ लोकसभेच्या उमेदवाराचे काम केले जाणार नाही. तर बारामती लोकसभेमध्ये जाऊन सुनेत्रा पवार यांचे काम केले जाईल, असा इशारा देखील यावेळी राष्ट्रवादी काँग्रेसचे तालुकाध्यक्ष गणेश खांडगे यांनी दिला.

बारामती लोकसभा मतदारसंघात अजित पवार यांच्याविरुद्ध शड्डू ठोकणारे शिंदे गटाचे नेते विजय शिवतारे यांनी कोणत्याही परिस्थितीत लोकसभा निवडणुकीतून माघार घेणार नाही, असे ठणकावून सांगितले आहे. त्यामुळे आता बारामती लोकसभेत महायुतीच्या उमेदवार सुनेत्रा पवार यांना विजय शिवतारे यांच्या कडव्या विरोधाचा सामना करावा लागणार, हे जवळपास निश्चित आहे.

अधिक वाचा –
– ‘शिर्डी मतदारसंघ साहेबांना सोडा.. नाहीतर मावळ आणि शिरूरमध्ये नोटाला मतदान करू’, भाजपाला कुणी दिलाय हा इशारा? वाचा
– वडगाव शहरात IPS सत्यसाई कार्तिक यांच्या पथकाचा छापा, अडीच लाखांचा प्रतिबंधित गुटखा जप्त, 3 जणांविरोधात गुन्हा । Maval Crime
– मळवली ते कामशेत स्थानकांदरम्यान तांत्रिक बिघाड झाल्याने पुणे-मुंबई रेल्वे सेवा विस्कळीत । Pune Mumbai Railway