Dainik Maval News : मावळ तालुक्यात असलेली दुष्काळ सदृश्य परिस्थिती लक्षात घेता मावळ तालुक्याचा समावेश देखील दुष्काळग्रस्त तालुका म्हणून व्हावा, या मागणीसाठी मावळ मधील विविध संघटना, शेतकरी यांच्याकडून प्रशासनाला पत्र व्यवहार करण्यात आला होता. मावळचे माजी आमदार, माजी राज्यमंत्री संजय उर्फ बाळा भेगडे यांनीही थेट मंत्रालय स्तरावर याबाबत पत्र व्यवहार केला होता.
बाळा भेगडे यांनी मंत्री चंद्रशेखर बावनकुळे यांना दिनांक 26 ऑक्टोबर रोजी मावळ तालुका दुष्काळग्रस्त तालुका म्हणून करण्याबाबत पत्र पाठवले होते. यात मावळ मधील सद्यस्थिती ही राज्यातील इतर दुष्काळग्रस्त तालुक्यांसारखे अत्यंत चिंताजनक दुष्काळजन्य असल्याचे लिहिले होते.
दरम्यान, मंगळवार दिनांक 27 ऑक्टोबर रोजी मुंबई येथे मंत्रालयात मंत्री चंद्रशेखर बावनकुळे यांच्या अध्यक्षतेखाली मंत्रिमंडळ उप समितीचे बैठक पार पडली. या बैठकीत राज्यात यापूर्वी 304 तालुक्यांचा दुष्काळग्रस्त क्षेत्रात समावेश करण्यात आला असून आणखीन काही भागांचा समावेश करण्याची मागणी प्राप्त झाली आहे, त्या ठिकाणी क्षेत्रीय पाहणी करून अंतिम अहवाल झाल्यानंतर त्या तालुक्याचा दुष्काळी तालुक्यात समावेश करण्याचा निर्णय घेण्यात येईल, असे मंत्री बावनकुळे यांनी सांगितले होते. त्यानुसार मावळ तालुक्याचाही दुष्काळग्रस्त तालुका यादी समाविष्ट करण्यासाठी आता शासकीय समितीद्वारे प्रत्यक्ष पाहणी करण्यात येणार आहे.
माजी राज्यमंत्री बाळा भेगडे, तसेच मावळचे विद्यमान आमदार सुनील शेळके यांनी मंत्रालय स्तरावर केलेल्या पाठपुराव्यानंतर आजच्या मंत्रिमंडळ उप समितीच्या बैठकीत मावळच्या दृष्टीने महत्त्वपूर्ण निर्णय झाल्याचे दिसत आहे. शासकीय समितीच्या भेटीनंतर अहवालास मंजुरी मिळाल्यास लवकरच मावळचाही समावेश दुष्काळी तालुक्यात होईल व मावळला दुष्काळ निवारणासाठी सरकार करत असलेल्या उपाययोजनांचा लाभ येथील शेतकऱ्यांना घेता येईल.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा
– दुष्काळग्रस्त तालुक्यांच्या यादीत मावळ, मुळशीचा समावेश करावा; पुणे जिल्हा परिषदेत ठराव एकमताने मंजूर
– कामशेत पोलिसांची तत्पर कामगिरी! हरवलेल्या चार अल्पवयीन बालकांचा अवघ्या तीन तासांत शोध ; पालकांच्या स्वाधीन
– वडगाव मावळमध्ये शुक्रवारपासून दिवसाआड पाणीपुरवठा ; पाणीसाठ्याचे नियोजन करण्यासाठी नगरपंचायतीचा निर्णय
– पक्ष नेतृत्वाच्या बदनामीकारक पोस्टना प्रतिक्रिया देऊ नये ; “सोशल मीडियावर निरर्थक वाद नको” – गणेश खांडगे
