Dainik Maval News : तळेगाव एमआयडीसी परिसरातून काही दिवसांपूर्वीच तीन बांगलादेशी नागरिकांना अटक करण्यात आली. पिंपरी-चिंचवड दहशतवाद विरोधी पथकाने सोमवारी (दि. 30 डिसेंबर) ही कारवाई केली. हे बांगलादेशी नागरिक नवलाख उंब्रे येथील एका कंपनीमध्ये मजुरीचे काम करीत होते. या अटक केलेल्या बांगलादेशी नागरिकांबाबत धक्कादायक माहिती समोर आली आहे. हे बांगलादेशी मागील पाच वर्षांपासून तिथेच वास्तव्यास होते, असे समजत आहे.
हुसेन शेख (31), मोनिरुल गाझी (26), अमीरूल साना (34, सातखिरा, बांगलादेश) अशी अटक केलेल्या बांगलादेशी नागरिकांची नावे आहेत. त्यांच्यासह त्यांना बनावट कागदपत्रे बनवून देणाऱ्या अनोळखी व्यक्ती विरोधात गुन्हा दाखल करण्यात आला आहे.
हुसेन शेख याचे घर भारत-बांगलादेश सीमेवर आहे. त्याचे काही नातेवाईक भारतातील पश्चिम बंगालमध्ये देखील आहेत. त्यामुळे त्याच्या नातेवाईकांकडे वारंवार येणेजाणे होत असे. 2019 मध्ये हुसेन शेख हा त्याचे मित्र मोनिरुल व अमीरूल यांना घेऊन भारतात आला. तिघेही कामाच्या निमित्ताने तळेगाव एमआयडीसी येथे आले. तिथेच एका कंपनीत काम करू लागले.
आरोपी हुसेन, मोनिरुल आणि अमीरूल यांनी तळेगाव येथे एका एजंट मार्फत बनावट कागदपत्रे तयार केली. आरोपींचे बनावट आधारकार्ड आणि पॅनकार्ड पोलिसांनी जप्त केले आहे. ज्या एजंट कडून त्यांनी कागदपत्रे काढून घेतली त्याच्याबाबत त्यांना देखील माहिती नसल्याने अनोळखी एजंट विरोधात गुन्हा दाखल करण्यात आला आहे.
हुसेन शेख व त्याचे दोन्ही साथीदार कंपनीमध्ये बंगाली भाषेत बोलत असत. त्यांची भाषा आणि वागणूक संशयास्पद वाटल्याने कंपनीमधील कामगारांना संशय आला. पोलिसांनी कंपनीत जाऊन तपासणी केली असता हुसेन, मोनिरुल आणि अमीरूल यांच्याकडील कागदपत्रे बनावट असल्याचे उघड झाले. त्यांच्याकडे चौकशी केली असता त्यांनी सहज भारतात प्रवेश केल्याचे सांगितले. पोलिसांनी तिघांना न्यायालयात हजर केले असता न्यायालयाने त्यांना पोलीस कोठडी सुनावली आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– मावळ तालुका पिंपरी-चिंचवड पोलीस आयुक्तालयाशी जोडला जाणार ; वडगाव, कामशेत, लोणावळा ठाण्यांबाबत प्रस्ताव सादर
– मराठी शाळा स्मार्ट व डिजिटल बनविणे काळाची गरज ; परांजपे विद्या मंदिर शाळेला डिजिटल इंटरॅक्टिव्ह स्मार्ट बोर्ड भेट
– तळेगाव दाभाडे शहरातील 350 वर्षे पुरातन बामणडोह विहिरीचे होणार संवर्धन, प्रत्यक्ष कामाला सुरुवात । Talegaon News
