Dainik Maval News : खडकाळा (कामशेत) ग्रुप ग्रामपंचायतीने केलेल्या घरपट्टी कर वाढीला तत्काळ स्थगिती द्यावी, अशी मागणी सर्वपक्षीय पदाधिकारी व नागरिकांनी केली आहे. तसेच या घरपट्टीवाढीच्या विरोधात शहरामध्ये सह्यांची मोहीम राबविली जात असून आतापर्यंत हजारो नागरिकांनी सही करीत कर वाढीला विरोध दर्शविला आहे.
कामशेत ग्रुप ग्रामपंचायतीकडून 30 टक्के घरपट्टी वाढविण्यात आली आहे. ग्रामपंचायतीच्या या करवाढी विरोधात सर्वपक्षीय पदाधिकाऱ्यांची बैठक बोलाविण्यात आली होती. या बैठकीत करवाढीला विरोध करीत ग्रामसभेच्या मान्यतेने कर वाढवावा. तत्पूर्वी ग्रामपंचायत 30 ऑक्टोबर 2023 च्या मंजूर ठरावाप्रमाणे वजावाढ वसुली ‘जैसे थे’ करण्यात यावी, 2024-25 करिता वाढीव घरपट्टी वसूल करण्यात आली, त्या पैशांचे समायोजन केले जावे अथवा ते नागरिकांना परत दिले जावेत, अशी मागणी बैठकीत करण्यात आली.
दरम्यान, कामशेत शहरामध्ये इंद्रायणी कॉलनी, पंचशिल कॉलनी, गणेशवाडी, दत्त कॉलनी, इतर भागात पाण्याचा मोठा प्रश्न आहे. तसेच मंगळवारी बेकायदेशीर हातगाडयांमुळे ट्रॅफीकची समस्या निर्माण होत आहे. ग्रामसभेतील ठरावाची अंमलबजावणीही होत नाही. शहरातील चांगले रस्ते फोडून रस्त्याचे विद्रुपीकरण केले जात आहे, अशा अनेक नागरी समस्या भेडसावत असताना ग्रामपंचायतीने करवाढ केल्याने नागरिकांमध्ये संतापाचे वातावरण आहे.
कामशेत शहरातील सदनिकांचे 100 टक्के फेरसर्वेक्षण केले जावे, 2024-25 मध्ये किती सदनिकांच्या घरपट्टीत 30 टक्क्यांनी वाढ झाली वा कोणाची झाली नाही तसेच किती सदनिकांची घसाराने घरपट्टी कमी झाली याची यादी प्रसिद्ध करावी, घरपट्टी कोणत्या आदेशाने वाढविली, याची माहिती मिळावी, अशीही मागणी करण्यात आली आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– राज्यातील 560 गोशाळांच्या बँक खात्यात 25 कोटी 44 लाखांचे अनुदान जमा ; तुमची गोशाळा असल्यास ‘असा’ मिळवा योजनेचा लाभ
– दिलासादायक ! राज्यातील 64 लाख शेतकऱ्यांना मिळणार 2 हजार 555 कोटींची विमा नुकसान भरपाई
– राज्यातील महामार्गांवर प्रत्येक 25 किलोमीटर अंतरावर महिलांसाठी सुसज्ज स्वच्छतागृह बांधणार – मंत्री आदिती तटकरे
– तळेगाव शहरातील वाहतुकीत मोठा बदल ; श्री डोळसनाथ महाराज वार्षिक उत्सवाच्या पार्श्वभूमीवर निर्णय । Talegaon Dabhade
