Dainik Maval News : संतश्रेष्ठ श्री तुकाराम महाराज यांच्या 340 व्या आषाढी वारी पायी पालखी सोहळ्याचे 18 जून रोजी देहूतून प्रस्थान होणार आहे. वारीच्या जुन्या अन् पवित्र परंपरेतील एक महत्त्वाचा लक्षवेधी भाग म्हणजे तुकोबारायांची पालखी ओढणारी बैलजोडी. तुकोबांच्या पालखीचा रथ ओढण्याचा मान यंदा सीमाभागातील आप्पाचीवाडी येथील खोत कुटुंबाच्या बैलजोडीला मिळाला आहे.
तुकाराम महाराज यांचा देहूगाव ते पंढरपूर दरम्यान आषाढी पायी वारी पालखी सोहळ्यातील रथ ओढण्याचा बहुमान आप्पाचीवाडी (ता. निपाणी) येथील बाबुराव अर्जुन खोत यांच्या माणिक – राजा ह्या बैलजोडीला कायमस्वरूपी लाभला आहे. ह्या बातमीने गावकऱ्यांच्या आनंदाला उधाण आले आहे.
- देहू संस्थांनने ही बैलजोडी खरेदी केली आहे. गावकऱ्यांनी पारंपारिक वाद्यांच्या गजरात मिरवणूक काढून बैलजोडीला देहू संस्थानकडे सुपूर्द केले आहे. अगदी पाहतच राहावा असा पांढरा शुभ्र, अंगाने धिप्पाड, एकसारखा जोडा असणारी ही बैलजोडी गावची शान होती. त्यामुळे बैलजोडीला निरोप देताना खोत कुटुंबासह गावकरी भावनाविवश झाले होते.
पालखी सोहळ्यासाठी बैलजोडी ही तात्पुरत्या स्वरूपात महाराष्ट्रातील शेतकऱ्यांकडून घेतली जात होती. मात्र रथ ओढण्यासाठी आपल्याच बैलजोडीला मान मिळावा यासाठी चढाओढ लागत असत. त्यामुळे रथासाठी हक्काची बैलजोडी असावी या उद्देशाने देहू संस्थानने महाराष्ट्रासह कर्नाटक सीमाभागात बैलजोडीची चाचपणी केली, त्यानंतर खोत यांची बैलजोडी पसंत आली व ती खरेदी केली.
आमच्या कुटुंबातील सदस्य असणाऱ्या बैलजोडीला तुकाराम महाराज यांच्या सेवेचा मान मिळाला हे आमचे परम भाग्य आहे. आमच्या कुटुंबीयांनी अगदी आनंदाने ही बैलजोडी देहू संस्थानकडे सोपविण्याचा एकमुखी निर्णय घेतला, असे बैलजोड मालक बाबुराव खोत यांनी सांगितले.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– पुणे जिल्हा परिषदेच्या ‘पुणे मॉडेल स्कूल’ उपक्रमाचा १४ जून रोजी शुभारंभ ; मावळ तालुक्यातील 24 शाळांचा समावेश
– केंद्र सरकारने पोल्ट्री व्यवसायासाठी बनविलेली नियमावली महाराष्ट्रात तातडीने लागू करा ; मावळ पोल्ट्री संघटनेचे निवेदन
– देहूरोड खून प्रकरणातील आरोपीला 24 तासात अटक ; पोलिसांनी गुजरातच्या वडोदरातून घेतले ताब्यात । Maval Crime
– विकसित कृषी संकल्प अभियान : मावळ तालुक्यातील शेतकऱ्यांना मिळाले तज्ज्ञांचे मार्गदर्शन । Maval News
