तळेगाव दाभाडे आणि इंदुरी येथील मंदिरांमधील चोरी प्रकरणी दोन सराईत गुन्हेगार अटकेत

Dainik Maval News : मावळ तालुक्यातील तळेगाव दाभाडे येथील जिजामाता चौकातील श्री तुळजा भवानी मंदिरातील देवीचा चांदीचा मुकुट चोरणारे आणि इंदुरीचे ग्रामदैवत श्री कडजाई मंदिरातील दानपेटी फोडणारे दोन अट्टल गुन्हेगारांना तळेगाव एमआयडीसी पोलिसांच्या पथकाने खेड तालुक्यातील चाकण परिसरातून अवघ्या ४८ तासांच्या आत जेरबंद केले. पथकाने आरोपींकडून सव्वा किलो चांदीच्या मुकुटासह रोख रक्कम हस्तगत केली आहे.

शुक्रवारी (दि. १२ जून) रोजी रात्री पावणेबाराच्या सुमारास इंदुरी गावातील कडजाई मातेच्या मंदिराचे कुलुपे तोडून, कडीकोयंडा उचकटून मंदिरात प्रवेश करून मंदिराच्या गाभाऱ्यात ठेवलेल्या दानपेटीचे कुलुप तोडून त्यामधील भाविकांनी दान केलेली अंदाजे ७ हजार रुपयांची रोख रक्कम चोरीस गेली होती. तसेच, तळेगाव दाभाडे येथील जिजामाता चौकातील श्री तुळजा भवानी देवीचा चांदीचा मुकुट तळेगाव दाभाडे पोलिसांनी हस्तगत करुन नेमका याच दिवशी मंदिरास सुपूर्द केला होता आणि पूर्नस्थापनेनंतर २४ तासांच्या आत मुकुट पुन्हा चोरीस गेल्याने परिसरात मोठी खळबळ माजली होती.

इंदुरी येथील श्री कडजाई मंदिरातील दानपेटीतील ऐवज चोरीप्रकरणी वनिता घनश्याम नाणेकर/गुरव (५२, शिवशक्ती चौक, इंदोरी, ता. मावळ, जि. पुणे) यांनी दिलेल्या फिर्यादीवरून तळेगाव एमआयडीसी पोलीस ठाण्यात दाखल गुन्ह्याच्या अनुषंगाने वरिष्ठ पोलीस निरीक्षक संतोष पाटील यांनी पथकास तपास करण्याच्या सूचना दिल्या होत्या. या प्रकरणी तपास पथकाने उपलब्ध सीसीटीव्ही फुटेजच्या आधारे तांत्रिक विश्लेषणाद्वारे तपास केला.

त्यानुसार, खेड तालुक्यातील वाकी फाटा येथून कुणाल बाळु विर (२३, सुंबरेनगर, चाकण, ता. खेड, जि-पुणे) आणि दुसरा आरोपी लोबो उर्फ सुर्या श्रीमंतहो दास (२६, कडाचीवाडी, चाकण, ता. खेड, जि. पुणे) यास रविवारी (दि. १४) चाकण परिसरातून ताब्यात घेऊन अटक केली. या प्रकरणी पोलीस पथकाने एकूण १ लाख २८ हजार रुपये किंमतीचा १ किलो २५० कि. ग्रॅ. वजनाचा चांदीचा मुकुट आणि इतर मुद्देमाल हस्तगत केला आहे.

तपासाअंती अटक केलेले दोन्ही आरोपी सराईत गुन्हेगार असून त्यांच्यावर तळेगाव, एमआयडीसी आणि दक्षिण म्हाळुंगे पोलीस ठाण्यात दाखल गुन्ह्यांनुसार त्यांनी घरफोडीसह इतरही गुन्हे केल्याचे निष्पन्न झाले. अटकेतील दोन्ही आरोपींना वडगाव मावळ न्यायालयाने १९ जूनपर्यंत पोलीस कोठडी सुनावली आहे.

पिंपरी चिंचवड पोलीस आयुक्तालय परीमंडळ ४च्या पोलीस उपआयुक्त श्वेता खेडकर, सहा. पोलीस आयुक्त सचिन कदम, वरिष्ठ पोलीस निरीक्षक संतोष पाटील यांच्या मार्गदर्शनाखाली तळेगाव एमआयडीसी पोलीस ठाण्याचे उपनिरिक्षक दिपक खरात, हवालदार अनंत रावण,वसीम शेख, अंमलदार ज्ञानेश्वर सातकर, विनायक शेरमाळे, रमेश घुले, रोहित माने, भीमराव खिलारे, गणेश दरदंले यांच्या पथकाने ही कारवाई केली.

( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा :
– मावळातील पीएम श्री आदर्श केंद्र जिल्हा परिषद प्राथमिक शाळा कान्हे येथील ‘शाळा प्रवेशोत्सव’ कार्यक्रमाला उपमुख्यमंत्री सुनेत्रा पवार यांची उपस्थिती
– मावळ तालुक्यातील ७३ ग्रामपंचायतींची आरक्षण सोडत प्रक्रिया पूर्ण; पावसाळ्यानंतर निवडणुकीचे बिगूल वाजणार?
– महिला शेतकऱ्यांना मिळणार स्वतंत्र ओळख; राज्याच्या पावसाळी अधिवेशनात सादर होणार ‘महिला शेतकरी सक्षमीकरण विधेयक’
– भीमाशंकर मंदिर दर्शनासाठी सुरु ; दर्शनाकरिता पास अनिवार्य – जिल्हा प्रशासनाची माहिती