Dainik Maval News : तळेगाव-चाकण-शिक्रापूर महामार्गाच्या विस्तारीकरणासह उन्नत मार्गाच्या कामाला आता गती मिळाली आहे. या कामाच्या कंत्राटदार कंपनीबरोबर अंतिम करार करण्याची प्रक्रिया महाराष्ट्र राज्य पायाभूत सुविधा विकास महामंडळाकडून (एमएसआयडीसी) सुरू आहे. ती लवकरच पूर्ण होऊन या प्रकल्पाचे काम सुरू होण्याच्या दिशेने पावले पडणार आहेत.
- तळेगाव-चाकण-शिक्रापूर हा महामार्ग सध्या दुपदरी आहे. जिल्ह्यातील प्रमुख औद्योगिक क्षेत्रांना जोडणारा हा महामार्ग आहे. यामुळे छोट्या वाहनांसह अवजड वाहनांची वाहतूकही त्यावरून मोठ्या प्रमाणात होते. या महामार्गावरून रोज ४० हजार ८३९ प्रवासी वाहने धावतात. त्यामुळे या महामार्गावर मोठ्या प्रमाणात वाहतूककोंडी होते. ही समस्या सोडविण्यासाठी या महामार्गाच्या विस्तारीकरणाचा प्रस्ताव मांडण्यात आला. राज्याच्या मंत्रिमंडळाने गेल्या वर्षी मार्च महिन्यात या प्रकल्पाला मंजुरी दिली. हा प्रकल्प राबविण्याची जबाबदारी भारतीय राष्ट्रीय महामार्ग प्राधिकरण आणि राज्य सरकारने ‘एमएसआयडीसी’वर सोपविली आहे.
महामंडळाने या प्रकल्पासाठी निविदा काढल्या होत्या. त्यात माँटेकार्लो या कंपनीला हे काम मिळाले आहे. या कंपनीबरोबर अंतिम करार करण्याची प्रक्रिया सुरू आहे. या प्रकल्पातील तळेगाव ते चाकण हा २४ किलोमीटरचा चौपदरी उन्नत मार्ग असेल आणि त्याखाली जमिनीला समांतर चौपदरी महामार्ग असेल. उर्वरित चाकण ते शिक्रापूर हा सहापदरी मार्ग असेल. हा प्रकल्प एकूण ५३.२ किलोमीटरचा असेल आणि त्यासाठी ६ हजार १५० कोटी रुपये खर्च येणार आहे. बांधा, वापरा आणि हस्तांतरित करा या तत्त्वावर हा प्रकल्प राबविण्यात येणार असल्याने त्यावर पथकर आकारणी केली जाणार आहे.
तळेगाव-चाकण-शिक्रापूर प्रकल्प
तळेगाव ते चाकण – चौपदरी महामार्ग व उन्नत मार्ग
चाकण ते शिक्रापूर – सहापदरी महामार्ग
एकूण लांबी – ५३.२ किलोमीटर
एकूण खर्च – ६ हजार १५० कोटी रुपये
भूसंपादनाची आवश्यकता – ३८.७९ हेक्टर
तळेगाव-चाकण-शिक्रापूर महामार्ग प्रकल्पाचे काम लवकरात लवकर सुरू करण्याचे नियोजन आहे. या कामाच्या कंत्राटदार कंपनीबरोबर अंतिम करारावर स्वाक्षरी करण्याची प्रक्रिया सुरू आहे. हा करार झाल्यानंतर संबंधित कंपनी प्रकल्पासाठी बँकांकडून कर्ज उभारणी करेल. पुढील सहा महिन्यांत भूसंपादन होऊन या प्रकल्पाचे प्रत्यक्ष काम सुरू होईल. – ब्रिजेश दीक्षित, व्यवस्थापकीय संचालक, एमएसआयडीसी
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मावळ तालुक्यातील विकास कामांना गती द्या, पावसाळापूर्व कामे तातडीने पूर्ण करा
– बुलेट ट्रेनने मुंबई-पुणे ४८ मिनिटांत; महाराष्ट्राला जागतिक पुरवठा साखळीचे केंद्र बनवणार -मुख्यमंत्री देवेंद्र फडणवीस
– लोणावळ्यात १ लाख ९३ हजारांचे मेफेड्रॉन जप्त ; एमडी विक्रीसाठी आलेल्या तरुणावर गुन्हा दाखल
– महत्वाची बातमी ! पुणे जिल्ह्यात ७४ सहाय्यक पोलीस निरीक्षक व उपनिरीक्षकांच्या बदल्या जाहीर
