Dainik Maval News : लोणावळा परिसरात अंमली पदार्थांची तस्करी आणि विक्री रोखण्यासाठी पोलीस प्रशासनाकडून कडक पावले उचलली जात आहेत. याच मोहिमेअंतर्गत लोणावळा शहर पोलिसांनी कारवाई करत तब्बल १ लाख ९३ हजार ९०० रुपये किमतीचे ‘एमडी’ (मेफेड्रॉन) हे अंमली पदार्थ जप्त केले असून, एका तरुणावर गुन्हा दाखल करण्यात आला आहे.
लोणावळा शहर पोलिसांनी दिलेल्या माहितीनुसार, १८ जून २०२६ रोजी रात्री ११:३० च्या सुमारास मॅकडोनाल्डस खालील वाहन पार्किंग परिसरात एक तरुण संशयास्पद हालचाली करत असल्याची माहिती पोलिसांना मिळाली होती.
स्थानिक गुन्हे शाखा, पुणे ग्रामीणचे पोलीस हवालदार गणेश होळकर यांनी या ठिकाणी धाव घेतली. यावेळी रोहन शंकर साठे (वय २२, सध्या रा. गुरव वस्ती, कुसगाव, ता. मावळ; मूळ रा. आपटी गेव्हंडे, ता. मावळ) या तरुणाची झडती घेतली असता, त्याच्याकडे प्लॅस्टिकच्या पिशवीत अंमली पदार्थ आढळून आला.
अंमली पदार्थांचा साठा जप्त
पोलिसांनी रोहन साठे यांच्याकडे असलेल्या पदार्थाची तपासणी केली असता, त्यात १९ ग्रॅम ३९ मिलीग्रॅम वजनाचे ‘एमडी’ (मेफेड्रॉन) हा अंमली पदार्थ मिळून आला. या जप्त केलेल्या अंमली पदार्थाची बाजारपेठेत किंमत १ लाख ९३ हजार ९०० रुपये इतकी आहे.
रोहन साठे याच्यावर अंमली पदार्थ विक्रीचा उद्देश आणि बेकायदेशीररित्या जवळ बाळगल्याप्रकरणी लोणावळा शहर पोलीस ठाण्यात एनडीपीएस (NDPS) कलम ८(क), २२(ब) नुसार गुन्हा दाखल करण्यात आला आहे. या प्रकरणी पुढील तपास महिला पोलीस उपनिरीक्षक (मपोसई) गव्हाणे करत आहेत. या कारवाईमुळे मावळ परिसरात अंमली पदार्थांच्या तस्करांचे धाबे दणाणले आहेत.
याविषयी बोलताना पोलीस निरीक्षक सचिन पाटील म्हणाले, लोणावळा शहरांमध्ये एमडी पावडर, गांजा, चरस अशा अमली पदार्थांची विक्री होत आहे. यावर कडक कारवाई करत तरुणाईला या अमली पदार्थांच्या विळख्यातून बाहेर काढणे यासाठी पोलीस प्रशासन सातत्यपूर्ण कारवाया करणार आहे. अमली पदार्थ तस्करांची कोणत्याही परिस्थितीमध्ये गय केली जाणार नाही असा स्पष्ट इशारा त्यांनी दिला आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मावळातील पीएम श्री आदर्श केंद्र जिल्हा परिषद प्राथमिक शाळा कान्हे येथील ‘शाळा प्रवेशोत्सव’ कार्यक्रमाला उपमुख्यमंत्री सुनेत्रा पवार यांची उपस्थिती
– मावळ तालुक्यातील ७३ ग्रामपंचायतींची आरक्षण सोडत प्रक्रिया पूर्ण; पावसाळ्यानंतर निवडणुकीचे बिगूल वाजणार?
– महिला शेतकऱ्यांना मिळणार स्वतंत्र ओळख; राज्याच्या पावसाळी अधिवेशनात सादर होणार ‘महिला शेतकरी सक्षमीकरण विधेयक’
– भीमाशंकर मंदिर दर्शनासाठी सुरु ; दर्शनाकरिता पास अनिवार्य – जिल्हा प्रशासनाची माहिती
