Dainik Maval News : मागील अनेक दिवसांपासून प्रतीक्षा ताणलेला मान्सून पाऊस अखेर मावळ तालुक्यात बरसू लागला आहे. रविवारपासूनच मावळ तालुक्यात हवामान बदलास सुरूवात झाली होती. ढगाळ वातावरण आणि वातावरणातील उकाडा वाढला होता. परंतु पाऊस काही बरसत नव्हता, मात्र मंगळवारी काळे ढग दाटून आले आणि तालुक्याच्या डोंगर परिसरातील पावसाला सुरूवात झाली. …अखेर मान्सून आला म्हणत नागरिकांनी मोकळा श्वास घेतला आहे. पवन मावळ विभागातील पवना धरण क्षेत्रातही पावसाला सुरूवात झाली आहे.
संपूर्ण उन्हाळ्यात तीव्र उष्णतेने पवना धरण जलाशयातील पाणीसाठा कमालीचा घटत चालला होता. गेल्या काही दिवसांपासून तर पिंपरी चिंचवड शहरात पाणीकपात सुरू करण्यात आली असून धरणाच्या पाण्यातील उपसा पूर्णतः बंद करण्यात आला आहे. अल निनो मुळे पाणी केवळ पिण्यासाठी वापरण्याकरिता ही उपाययोजना करण्यात आली आहे. दरम्यान मंगळवारपासून पावसाला सुरूवात झाली असली तरीही धरणक्षेत्रात पाण्याची आवक वाढेल असा पाऊस होत नसल्याने पाणीकपातीचे संकट कायम असून उपाययोजना देखील कायम आहेत.
स्थानिक प्रशासनाने दिलेल्या माहितीनुसार, बुधवारी सकाळी सहा वाजता घेतलेल्या नोंदीनुसार पवना धरण क्षेत्रात सद्यस्थितीत १८.०२ टक्के इतका पाणीसाठा शिल्लक आहे, गेल्या २४ तासांत धरणक्षेत्रात ४२ मि.मी. इतका पाऊस झाला आहे. तर चालू वर्षीचा एकूण पाऊस ६५ मि.मी. इतका नोंदविण्यात आला आहे. धरणातून कोणताही विसर्ग सुरू नसून पाणी नियोजन सुरूच आहे.
बळीराजाला दिलासा –
मंगळवारपासून सुरू झालेल्या पावसामुळे बळीराजाला मोठा दिलासा मिळाला आहे. मृग नक्षत्राच्या आधारे पेरणी केलेले भात बियाणे पाण्याअभावी संकटात होते. अनेक शेतकऱ्यांनी कृत्रिमरित्या पाणी दिले होते. परंतु, अन्य भागात शेतकरी पावसाचीच वाट पाहत होते. अखेर मंगळवारपासून या भागात जवळपास सर्वत्र पावसाच्या सरी कोसळू लागल्याने भात रोपांना नवसंजिवनी मिळाली आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मावळ तालुक्यातील विकास कामांना गती द्या, पावसाळापूर्व कामे तातडीने पूर्ण करा
– बुलेट ट्रेनने मुंबई-पुणे ४८ मिनिटांत; महाराष्ट्राला जागतिक पुरवठा साखळीचे केंद्र बनवणार -मुख्यमंत्री देवेंद्र फडणवीस
– लोणावळ्यात १ लाख ९३ हजारांचे मेफेड्रॉन जप्त ; एमडी विक्रीसाठी आलेल्या तरुणावर गुन्हा दाखल
– महत्वाची बातमी ! पुणे जिल्ह्यात ७४ सहाय्यक पोलीस निरीक्षक व उपनिरीक्षकांच्या बदल्या जाहीर
