Dainik Maval News : एका व्यावसायिकाच्या वाहन चालकास पैशांच्या देवाण-घेवाणीवरून आठ ते नऊ जणांच्या टोळक्याने कोयता, दांडक्याने मारहाण केली. यावेळी जीव वाचण्यासाठी संबंधित व्यक्तीने केलेल्या गोळीबारात एकाचा जागीच मृत्यू झाला असून दोन जण जखमी झाले आहेत. ही घटना बुधवारी (दि. 3) रात्री साडेनऊच्या सुमारास कामशेत पोलीस ठाणे हद्दीतील मुंढावरे गावजवळील इंद्रायणी ढाब्याजवळ घडली.
याप्रकरणी कामशेत पोलिसांनी तिघांना ताब्यात घेतले असून इतर पाच ते सहाजण फरार आहेत. रोहित मदन कुर्मा (25, रा. रामनगर, पिंपरी) असे गोळीबारात मृत्यू झालेल्याचे नाव आहे. फिर्यादी आरोपी अशोककुमार मुनेष्वर सिंग (60, रा. तापकीरमळ चौक, काळेवाडी, पिंपरी, मूळ रा. आजमगढ, उत्तर प्रदेश) व आकाश ऊर्फ बंटी भवरसिंग राजपूत (23, रा. रामनगर, देहूरोड) अशी आरोपींची नावे असून, इतर सहा ते सात जणांची ओळख पटली नाही.
कामशेत पोलीस ठाण्याचे पोलिस निरीक्षक शंकर पाटील यांनी दिलेल्या माहितीनुसार, फिर्यादी आरोपी अशोककुमार मुनेष्वर सिंग हा वाहनचालक असून, त्याचा मालक हरीश सिंग हा आहे. हरीश सिंग आणि आरोपी आकाश ऊर्फ बंटी भवरसिंग राजपूत यांच्यात व्यावसायातील पैशांवरून वाद होता. या वादातून आकाश राजपूत आणि त्याच्या आठ ते नऊ साथीदारांनी फिर्यादी अशोककुमार मुनेष्वर सिंग याला मुंढावरे गावच्या हद्दीतील इंद्रायणी ढाबा येथे गाठून शिवीगाळ केली; तसेच त्याला आणि त्याचा मालक हरीश सिंग याला जीवे मारण्याची धमकी दिली; तसेच तुम्ही आमच्या व्यवहाराचे पैसे दिले नाहीत, तुम्हाला संपवूनच टाकतो, असे म्हणत अशोककुमारच्या कारवर कोयते, दांडक्यांनी हल्ला करून नुकसान केले व गाडीतून खाली ओढून त्याच्यावर हत्यारांनी हल्ला केला.
यावेळी अशोककुमारने या हल्ल्यातून वाचण्यासाठी स्वसंरक्षणार्थ टोळक्याच्या दिशेने गोळीबार केला. या गोळीबारात रोहित कुर्माच्या डोक्याला गोळी लागल्याने त्याचा जागीच मृत्यू झाला. तर, अशोककुमार मुनेष्वर सिंग आणि इतर दोघेजण जखमी झाले आहेत. घटनेची माहिती मिळताच लोणावळा उपविभागीय पोलीस अधिकारी गजानन टोम्पे, कामशेत पोलीस निरीक्षक शंकर पाटील, पुणे ग्रामीण स्थानिक गुन्हे शाखेचे पोलिस निरीक्षक अविनाश शिळीमकर यांच्यासह कामशेत पोलिसांनी घटनास्थळी धाव घेतली.
याप्रकरणी पोलिसांनी अशोककुमार मुनेश्वर सिंग याच्यासह इतरांना दोघांना ताब्यात घेतले. तसेच, या घटनेत जखमी झालेल्यांना उपचारासाठी दवाखान्यात दाखल करण्यात आले असून, त्यांच्यावर उपचार सुरू आहेत. याप्रकरणी दोन्ही बाजूकडून एकमेंकाविरोधात फिर्याद दाखल करण्यात आली. तसेच, या प्रकरणातील इतर फरारी आरोपींचा पोलिस शोध घेत आहे.
आरोपी आकाश उर्फ बंटी भवरसिंग राजपूत आणि रोहित मदन कुर्मा हे दोघे सराईत गुन्हेगार आहेत. आकाश ऊर्फ बंटी भवरसिंग राजपूतच्या विरोधात पिंपरी पोलीस ठाण्यात तीन गुन्हे दाखल आहेत. तर, मयत आरोपी रोहित कुर्मा याच्या विरोधात पिंपरी, निगडी व मंचर पोलिस ठाण्यात गुन्हे दाखल आहेत. या घटनेचा तपास पोलिस निरीक्षक शंकर पाटील हे करीत आहेत.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा –
– राज्यातील सर्व नगरपंचायत, नगरपरिषदांची मतमोजणी २१ डिसेंबरला होणार ; काय आहे नागपूर खंडपीठाचा आदेश? वाचा सविस्तर
– तळेगाव दाभाडे नगरपरिषद निवडणुकीत मोठा ट्विस्ट ! सहा जागांवरील निवडणूक स्थगित, ‘हे’ आहे कारण
– कुसगांव बुद्रुक – काले जिल्हा परिषद गटात दत्तात्रय उर्फ भाऊसाहेब गुंड यांचा गावभेट दौरा उत्साहात सुरू
– कार्ला-खडकाळा जिल्हा परिषद गट : आशाताई वायकर यांचा शिलाटणे गावभेट दौरा उत्साहात
