Dainik Maval News : तळेगाव दाभाडे नगरपरिषद कार्यालयामध्ये महसूल विभाग आणि तळेगाव दाभाडे नगरपरिषद प्रशासनाच्या संयुक्त विद्यमाने छत्रपती शिवाजी महाराज महाराजस्व समाधान शिबिर आयोजित करण्यात आले होते. या शिबिरात नागरिकांना विविध दाखल्यांचे वाटप करण्यात आले.
हा महाराष्ट्र शासनाचा एक अत्यंत महत्त्वाचा उपक्रम असून शासन आपल्या दारी या संकल्पनेवर आधारित “महाराजस्व समाधान शिबिर” हे अभियान दि. १५ मे २०२६ रोजी राबविले गेले. ग्रामीण भागातील नागरिकांना विविध प्रकारचे दाखले, जमीन जुमल्याची कागदपत्रे किंवा सरकारी योजनांचा लाभ घेण्यासाठी वारंवार सरकारी कचऱ्यांमध्ये हेलपाटे मारावे लागतात ही प्रक्रिया सोपी व्हावी आणि प्रशासनाने स्वतः जनतेपर्यंत पोहोचून त्यांच्या तक्रारींचे निवारण करावे या विचारातून सदरचे समाधान शिबिर राबविण्यात आले होते.
या शिबिराला तहसीलदार विक्रम देशमुख, नगराध्यक्ष संतोष दाभाडे पाटील, उपनगराध्यक्ष गणेश काकडे, विरोधी पक्षनेते संतोष भेगडे,आरोग्य समिती सभापती निखील भगत,नगरसेवक सागर बोडके, मुख्याधिकारी गिरीश दापकेकर, माणिक साबळे तसेच नगरपरिषदेचे सर्व कर्मचारी तसेच नगरसेवक आणि नगरसेविका उपस्थित होते.
शिबिरात तळेगाव दाभाडे शहरातील आणि शहराच्या शेजारील गावातील नागरिकांना हवे असलेले दाखले उपस्थित मान्यवरांच्या हस्ते वाटप करण्यात आले. त्यामध्ये निवासी दाखला ( Domicile Certificate), जातीचे प्रमाणपत्र ( Cast certificate), चारित्र्य दाखला ( non Crimilear certificate) , जन्म दाखला (Birth certificate), विवाह नोंदणी दाखला (Marriage Registration certificate), नळ जोड आदेश तसेच तालुका कृषी विभागाच्या वतीने प्रमाणपत्रे देण्यात आली तसेच पंचायत समिती वडगाव मावळ महिला व बालकल्याण विभागाच्या वतीने गरोदर महिलांसाठी बेबी केअर किट, मनीषा रवी शेळके (माळवाडी) यांना देण्यात आले.
यावेळी तहसीलदार विक्रम देशमुख यांनी सदरचे शिबिर आयोजित करण्याच्या पाठीमागचा उद्देश सांगितला तसेच नगराध्यक्ष संतोष दाभाडे पाटील यांनी सुद्धा सदर शिबिर नागरिकांना वारंवार हेलपाटे मारावे लागू नये म्हणून नागरिकांच्या हितासाठी राबविण्यात आल्याची माहिती दिली. कार्यक्रमाचे सूत्रसंचालन जनसंपर्क अधिकारी भास्कर वाघमारे यांनी केले.नियोजन भांडार प्रमुख रोहित भोसले,करसंकलन प्रमुख कल्याणी लाडे,विभा वाणी यांनी केले.आभार मुख्याधिकारी गिरीश दापकेकर यांनी मानले.
यावेळी जातीचा दाखला – १५, उत्त्पन्न दाखला – ४५, निवासी दाखला -२७, चारित्र्य दाखला – ३४, तलाठी उत्त्पन्न दाखला -१३४, एक खिडकी योजना – १०, आधार नोंदणी – ४०, विवाह नोंदणी दाखला – ०७, जन्म दाखला – ०८, नळ जोडणी आदेश -०१, बचत गट नोंदणी प्रमाणपत्र – ०२ या दाखल्याचे वाटप करण्यात आले.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– आर्थिकदृष्ट्या दुर्बल आणि होतकरू विद्यार्थ्यांना उच्च माध्यमिक शिक्षणाची संधी ! तळेगाव नगरपरिषदेकडून कनिष्ठ महाविद्यालयाची घोषणा
– कुंभार कारागिरांना 9 महिने उचलता येणार माती, 700 ब्रासच्या मर्यादेवर कोणताही दंड नाही ; वीटभट्टीसाठी ५ वर्षांसाठी सलग परवानगी मिळणार
– पशुपालकांनो.. पशुधनाची काळजी घ्या, पशुधनामध्ये उष्माघाताची लक्षणे दिसल्यास ‘या’ उपाययोजना करा
