Dainik Maval News : मावळ तालुक्यातील टाकवे बुद्रुक येथील औद्योगिक वसाहतीच्या विकासाला गती मिळणार असून या औद्योगिक वसाहतीचे पूर्वीचे नाव इंद्रायणी औद्योगिक सहकारी वसाहत हे बदलून आता ‘कृष्णरावजी भेगडे इंद्रायणी औद्योगिक सहकारी वसाहत मर्यादित, मावळ’ असे अधिकृतरित्या करण्यात आल्याची माहिती संस्थेचे अध्यक्ष नंदकुमार शेलार यांनी दिली.
शुक्रवार, दिनांक २ जानेवारी रोजी वडगाव मावळ येथे आयोजित पत्रकार परिषदेत श्री. शेलार यांनी हि माहिती दिली. याप्रसंगी नंदकुमार शेलार यांसह सचिन उर्फ बाळासाहेब ढोरे, राजेश गाडे पाटील, अरुण वाघमारे, प्रा. सत्यजित खांडगे, बाळासाहेब गाडे पाटील, हर्षवर्धन शिंदे आदीजण उपस्थित होते.
मावळ तालुक्यातील उद्योजकांना उद्योग उभारणीसाठी अनुकूल वातावरण मिळावे, याकरिता मावळभूषण स्व. आमदार कृष्णरावजी भेगडे साहेब यांनी तत्कालीन परिस्थितीतही टाकवे बुद्रुक येथे औद्योगिक वसाहत उभारण्यासाठी मोलाचे योगदान दिले. यामुळेच आज मावळ तालुक्यातील या भागात उद्योगविस्तार होत असून स्व. भेगडे साहेब यांचे नाव औद्योगिक वसाहतीस देण्याचा निर्णय सर्वानुमते घेण्यात आला व त्यानुसार हे नामकरण होत असल्याचे श्री शेलार यांनी सांगितले.
मावळ तालुक्याच्या सर्वांगीण विकासाचे शिल्पकार, मावळभूषण माजी आमदार स्व. कृष्णरावजी भेगडे यांच्या दूरदृष्टी नेतृत्वातून आकाराला आलेल्या या वसाहतीच्या नामकरणास सहकार विभागाने अधिकृत मंजुरी देत कागदोपत्री शिक्कामोर्तब केले आहे, अशी माहिती नंदकुमार शेलार यांनी दिली.
कृष्णरावजी भेगडे इंद्रायणी औद्योगिक सहकारी वसाहत –
मावळ तालुक्यातील टाकवे बुद्रुक परिसरात वसलेली कृष्णरावजी भेगडे इंद्रायणी औद्योगिक सहकारी वसाहत ही उद्योजकांसाठी विकासाचा आधारस्तंभ ठरत आहे. लघु, मध्यम व मोठ्या उद्योगांना एकत्र आणत उद्योजकांना जागा, पाणीपुरवठा, वीज तसेच आवश्यक पायाभूत सुविधा उपलब्ध करून देण्याचे महत्त्वपूर्ण कार्य ही संस्था करत आहे. सध्या वसाहतीमध्ये एकूण २५ पैकी १९ कारखाने कार्यरत असून येत्या काळात अनेक नवीन उद्योग येथे दाखल होणार आहेत. यामुळे मावळ परिसरात रोजगारनिर्मितीला मोठी चालना मिळणार आहे.
मावळभूषण कृष्णराव भेगडे व्याख्यानमालेत प्रातिनिधिक अनावरण –
तळेगाव दाभाडे येथे मावळभूषण कृष्णराव भेगडे जाहीर व्याख्यानमालेच्या ११व्या वर्षातील दुसऱ्या दिवशी, दि. २६ डिसेंबर २०२५ रोजी औद्योगिक वसाहतीच्या नामकरण केलेल्या नामफलकाचे प्रातिनिधीक अनावरण करण्यात आले. यावेळी ज्येष्ठ उद्योगपती व कायनेटिक ग्रुपचे अध्यक्ष पद्मश्री अरुणजी फिरोदिया, मालपाणी उद्योगसमूहाचे सर्वेसर्वा मा. संजयजी मालपाणी तसेच संत साहित्याचे अभ्यासक डॉ. सदानंद मोरे यांची प्रमुख उपस्थिती होती.
लवकरच कमानीचे भूमिपूजन –
नामकरणानंतर औद्योगिक वसाहत संस्थेच्या आवारात मुख्य प्रवेशद्वारावर उभारण्यात येणाऱ्या भव्य कमानीचे भूमिपूजन लवकरच करण्यात येणार आहे. तसेच संस्थेच्या आवारात स्व. भेगडे साहेबांचे स्मारक उभारण्यात येणार असल्याचेही माहिती संस्थेचे अध्यक्ष नंदकुमार शेलार यांनी दिली. सध्या संस्थेचे अध्यक्षपद श्री. शेलार हे संभाळत असून कार्यकारिणी सदस्य म्हणून गणेश खांडगे, राजश्री म्हस्के, सचिन उर्फ बाळासाहेब ढोरे, अरूण वाघमारे आदी सहकारी कार्यरत आहेत.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा –
– श्री लोहगड ते श्री भिवगड : मावळ तालुक्यात तब्बल 23 वर्षांनंतर धारातीर्थ गडकोट मोहीम – जाणून घ्या मोहिमेबद्दल
– पक्के ड्रायव्हिंग लायसन्स पाहिजे? आरटीओकडून जानेवारी महिन्याचे वेळापत्रक जाहीर
– धक्कादायक ! खोपोलीत नवनिर्वाचित नगरसेविकेच्या पतीला संपवलं ; रस्त्यात गाडी अडवून केला प्राणघातक हल्ला
– कामशेतमधील वाहतूक कोंडी सोडविण्यासाठी पोलिसांकडून एकेरी वाहतुकीचा पर्याय, 1 जानेवारीपासून अंमलबजावणी ; पाहा कुठून एन्ट्री, कुठे होणार एक्झिट
