तळेगाव नगरपरिषदेच्या वाढीव कर आकारणीला मुख्यमंत्र्यांकडून स्थगिती. करवाढीला मुख्यमंत्र्यांकडून स्थगिती मिळवत आमदार शेळके यांनी दिला तळेगावकरांना मोठा दिलासा! ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
तळेगाव दाभाडे नगरपरिषद प्रशासनाने 50 ते 200 टक्के कर वाढ केल्याने नागरिकांमध्ये संतप्त प्रतिक्रिया उमटली आहे. या पार्श्वभूमीवर वाढीव कर आकारणीला थेट मुख्यमंत्र्यांकडून स्थगिती मिळवत आमदार सुनील शेळके यांनी तळेगावकरांना मोठा दिलासा दिला आहे. तळेगाव दाभाडे नगर परिषदेकडून नागरिकांना वाढीव कर आकारणी बाबत नोटीसा गेल्यामुळे नागरिकांमध्ये तीव्र प्रतिक्रिया उमटली. नागरिकांनी वाढीव कर भरू नये तसेच त्याविरुद्ध नगरपरिषद कार्यालयात जाऊन हरकत नोंदवावी, असे आवाहन आमदार शेळके यांनी केले होते. ( Maharashtra Government suspends Talegaon Municipal Council’s increased tax levy cm eknath shinde mla sunil shelke )
एवढ्यावरच न थांबता आमदार शेळके यांनी थेट मुख्यमंत्री एकनाथ शिंदे यांची भेट घेतली. तळेगाव दाभाडे नगर परिषदेने केलेल्या वाढीवकर आकारणीला त्वरित स्थगिती द्यावी अशी मागणी करणारे निवेदन त्यांना दिले. त्याची तातडीने दखल घेत मुख्यमंत्री शिंदे यांनी नगर विकास विभागाच्या प्रधान सचिवांना त्याबाबतचे आदेश दिले. वाढीवकर आकारणीला स्थगिती देऊन त्यावर सुनावणी करावी, असा शेरा मुख्यमंत्री शिंदे यांनी निवेदनावर लिहिला आहे.
राज्य शासनाने तळेगाव दाभाडे नगरपरिषदेच्या वाढीव कर आकारणीला स्थगिती देऊन नागरिकांना दिलासा दिल्याबद्दल आमदार शेळके यांनी मुख्यमंत्री एकनाथ शिंदे यांचे आभार मानले. या कर आकारणी करदात्यांनी हरकती घेतल्या असून त्यावर सुनावणी होणार आहे. या सुनावणीनंतर ही करवाढ पूर्णपणे रद्द करण्यासाठी आपण आग्रही आहोत, असे आमदार शेळके यांनी सांगितले.
राज्य शासनाने स्थगिती दिल्यामुळे तळेगावकर नागरिकांनी ही लढाई अर्धी जिंकली आहे. करवाढ पूर्णपणे रद्द होईपर्यंत हा लढा चालूच राहील, असा निर्धार आमदार शेळके यांनी व्यक्त केला.
अधिक वाचा –
– संस्कृती फाऊंडेशन आणि राष्ट्रवादी महिला काँग्रेसकडून बारावी परीक्षेत प्रथम क्रमांक पटकावलेल्या विद्यार्थ्याला मदतीचा हात !
– महालक्ष्मी एक्सप्रेसमध्ये झाला मुलीचा जन्म, मुस्लीम कुटुंबीयांनी मुलीचे नाव ठेवले ‘महालक्ष्मी’, लोणावळा स्थानकावरील घटना
– अजिवली शाळेतील शिक्षिका वर्षा बारबोले यांना जिल्हास्तरीय गुणवंत शिक्षक पुरस्कार
