‘मावळ मतदारसंघातील सर्व 25 लाख मतदार हे माझे नातेवाईक’, नात्यागोत्याच्या राजकारणावर श्रीरंग बारणेंचे रोखठोक उत्तर

मावळ लोकसभा मतदारसंघातील सर्व 25 लाख मतदार हे माझे नातेवाईक आहेत, असे मावळ लोकसभेचे महायुतीचे उमेदवार श्रीरंग बारणे यांनी म्हटले आहे. कासारवाडी येथे आज, सोमवारी (दि. एप्रिल) मावळ लोकसभेचे शिवसेना-भाजप-राष्ट्रवादी-आरपीआय-रासप व मित्रपक्षांच्या महायुती चे उमेदवार खासदार श्रीरंग बारणे यांच्या निवडणूक प्रचाराबाबत सविस्तर माहिती देण्यासाठी पत्रकार परिषदेचे आयोजन करण्यात आले होते. यावेळी पत्रकारांच्या प्रश्नांना उत्तर देत असताना बारणे यांनी वरील विधान केले. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )

मावळ लोकसभा मतदारसंघातील 25 लाख मतदार माझे नातेवाईक – बारणे
पत्रकार परिषदेदरम्यान प्रश्नोत्तर सुरु असताना माध्यम प्रतिनिधींना बारणेंना, महाविकास आघाडीच्या उमेदवाराकडून नात्यागोत्याचे राजकारण केले जात असल्याबद्दल विचारण्यात आले. त्यावर बोलताना बारणे यांनी, या मतदारसंघातील सर्व 25 लाख मतदार हे माझे नातेवाईक व हितचिंतक आहेत, असे म्हटले. तसेच देशाची सुरक्षितता व गतिमान विकास यासाठी नरेंद्र मोदी हेच पुन्हा पंतप्रधान व्हावेत, अशी देशातील बहुतांश नागरिकांची भावना आहे. त्याचबरोबर गेल्या दहा वर्षात मी केलेले काम आणि मतदारसंघात सातत्याने ठेवलेला संपर्क यामुळे आपण विक्रमी मताधिक्याने निवडून येऊ, असा विश्वासही बारणे यांनी व्यक्त केला. ( Maval Lok Sabha Constituency Shiv Sena Candidate Shrirang Barane Press Conference )

समोरच्या उमेदवाराचे किती आव्हान असेल?
समोरच्या उमेदवाराचे तुम्हाला किती आव्हान असेल? असा प्रश्न माध्यम प्रतिनिधी यांनी खासदार बारणे यांना विचारला. त्यावर बोलताना त्यांनी, समोर कोण उमेदवार आहे माहिती नाही, असे म्हणत ठाकरे गटाचे उमेदवार संजोग वाघेरे यांचे कोणतेही आव्हान आपल्या समोर नसल्याचे सांगितले. परंतू लागलीच त्यांनी, माझ्या बोलण्याचा गैरअर्थ काढू नका, उमेदवारी अर्ज भरल्यानंतर समोर कोण उमेदवार आहे, हे स्पष्ट होईल, असे तत्काळ स्पष्टीकरण बारणे यांनी दिले.

यावेळी माजी खासदार अमर साबळे, आमदार उमा खापरे, अण्णा बनसोडे, अश्विनी जगताप, भाजपच्या शहराध्यक्ष शंकर जगताप, राष्ट्रवादी काँग्रेसचे शहर अध्यक्ष अजित गव्हाणे, शिवसेनेचे जिल्हाप्रमुख बाळासाहेब वाल्हेकर, आरपीआयच्या नेत्या चंद्रकांता सोनकांबळे, मावळ मतदार संघ समन्वयक सदाशिव खाडे, रासपचे कार्याध्यक्ष परमेश्वर बुरले, उपाध्यक्ष अजित चौगुले तसेच अमित गोरखे, सुजाता पलांडे, नामदेव ढाके, अनुप मोरे, राजू दुर्गे, नीलेश तरस, मोरेश्वर शेडगे, माऊली थोरात, नारायण बहिरवाडे, राजेश पिल्ले, संजय मंगोडेकर, कुणाल वाव्हळकर आदी प्रमुख पदाधिकारी व्यासपीठावर उपस्थित होते.

अधिक वाचा –
– किल्ले तिकोणा गडावर यंदाही जल्लोषात साजरी होणार श्रीराम नवमी । Tikona Fort
– मोरया प्रतिष्ठानची ‘सफर गड दुर्गांची’ पाचवी मोहिम किल्ले तिकोणा गडावर, 90 बालकांचा सहभाग । Vadgaon Maval
– आमदार सुनिल शेळके आणि खानदेश युवा मंचच्या पाठपुराव्याला यश; तळेगाव ते चोपडा नियमित बससेवा सुरु