मावळ लोकसभा मतदारसंघात आज मोठी राजकीय घडामोड घडली आहे. ज्या घडामोडची अटकळ दैनिक मावळकडून काही दिवसांपूर्वीच करण्यात आली होती. पिंपरी-चिंचवड महापालिकेचे माजी महापौर तथा राष्ट्रवादी काँग्रेसचे माजी शहाराध्यक्ष संजोग वाघेरे-पाटील यांनी आज शनिवारी (दि. 30 डिसेंबर) मातोश्री निवासस्थानी उद्धव ठाकरे यांची भेट घेऊन शिवसेना (उ.बा.ठा.) पक्षात प्रवेश केला आहे. माजी मुख्यमंत्री तथा पक्षप्रमुख उद्धव ठाकरे यांनी स्वतः संजोग वाघेरे यांच्या हातात शिवबंधन बांधून त्यांचे पक्षात स्वागत केले. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
मावळ लोकसभा मतदारसंघाचे विद्यमान खासदार श्रीरंग बारणे हे शिवसेना शिंदे गटात गेल्याने शिवसेनेची पारंपारिक जागा असलेल्या या ठिकाणी ठाकरे गटाकडूनही जोरदार तयारी सुरु आहे. एकीकडे आगामी लोकसभेसाठी श्रीरंग बारणे यांनी पुन्हा एकदा स्वतःची उमेदवारी घोषित केली असताना दुसरीकडे आता ठाकरे गटाकडूनही संजोग वाघेरे यांना उमेदवारी मिळण्याचे संकेत दिले आहेत. ( NCP Leader Sanjog Waghere Joins Shivsena UBT May Be Contest Upcoming Maval Lok Sabha Election 2024 )
उद्धव साहेब देणार ती जबाबदारी पार पाडणार – संजोग वाघेरे
“मागच्या काळात मुख्यमंत्री असताना उद्धव ठाकरे यांनी कोरोना काळात अत्यंत महत्वाचे काम केले. त्यावेळेचे काम पाहून मी उद्धव ठाकरे यांच्याबाबत भावूक झालो होतो. तसेच संजय राऊत हे दरदिवशी मीडियाच्या माध्यमातून दिशा देण्याचे काम करतात. ठाकरे गटाने मागच्या काळात अनेक महत्वाची काम केली आहेत. त्यामुळेच माझ्या कार्यकर्त्यांच्या मनात उद्धव ठाकरेंच्या नेतृत्वाखाली काम करायचे, असे ठरले आणि त्यांची भेट घेतली. त्यानंतर आज हजारो कार्यकर्त्यांच्या सोबत ठाकरे गटात प्रवेश केला आहे. तसेच उद्धव साहेब जी जबाबदारी माझ्यावर देतील, ती पार पाडेन” असे संजोग वाघेरे यांनी बोलताना सांगितले.
मावळची जागा पुन्हा शिवसेनेकडे खेचून आणायचीये – संजय राऊत
“पन्नास खोके आणि स्कॉर्पिओ बॉलेरो यांना लाथाडून संजोग वाघेरे यांनी शिवसेनेत प्रवेश केला. शिवसेना पक्षप्रमुख उद्धव ठाकरे यांनी त्यांना शिवबंधनात बांधून परिवारात सामावून घेतले आहे. आम्ही प्रत्येक वेळी शिवसेनेत भावूक होतो. यातच आता संजोग वाघेरे यांना मावळ जागा पुन्हा शिवसेनेकडे खेचून आणायची जबाबदारी आहे. नववर्ष मावळतांना पुन्हा मावळ आपल्याकडे उजेडात आणायचं आहे.” असे खासदार संजय राऊत यांनी म्हटले.
मावळ मतदारसंघ पहिल्यापासूनच शिवसेनेकडे राहिलाय – उद्धव ठाकरे
“मातोश्रीत आलेल्या सर्व शिवसेनेच्या वाघांनो तुमचं मातोश्री आणि शिवसेनेत स्वागत करतो. असा काळ आहे की आता भावूक आणि घाऊक असा फरक कळायला लागला आहे. जे भावूक आहेत ते निष्ठेने शिवसेनेसोबत आहेत. परंतू जे घाऊक आहेत त्यांना खोक्यांमध्ये बांधून ठेवण्याची गरज आहे. सुरूवातीपासून मावळ मतदारसंघ शिवसेनेकडे राहिला आहे. गद्दार आणि स्वाभिमानी यातला फरक संजोग वाघेरे यांच्यामध्ये आहे. आज शिवसेनेकडे काहीच नाही. परंतू सत्ताधाऱ्यांनी सत्ता हिसकावून घेतली आणि गद्दारी केली. परंतू सत्ताधारी पक्षाकडे गर्दीचा ओघ असतो. परंतू सत्ता नसतांना सत्ता आणण्याच्या जिद्दीने आपण आला आहात,” अशी प्रतिक्रिया उद्धव ठाकरे यांनी पक्षप्रवेशावेळी बोलताना दिली.
अधिक वाचा –
– मावळ तालुका राष्ट्रवादी काँग्रेस पक्षात जोरदार इनकमिंग! Maval Politics
– महत्वाचा निर्णय! पवना आणि इंद्रायणी नद्या उगमापासून स्वच्छ होणार । Amrit Yojana
– लोणावळा पोलिस इन ॲक्शन मोड! वेहेरगावातील मटका अड्ड्यावर धडक कारवाई, 16 जणांविरोधात गुन्हा दाखल । Lonavala Crime
