Dainik Maval News : मावळ तालुका कृषी उत्पन्न बाजार समितीवर प्रशासक नियुक्त करण्याच्या जिल्हा उपनिबंधकांच्या निर्णयाला राज्याचे सहकार व पणन मंत्री जयकुमार रावल यांनी पुढील आदेशापर्यंत स्थगिती दिली आहे. या निर्णयामुळे भाजपाचे सभापती सहीत पाचही संचालकांना मोठा दिलासा मिळाला आहे. या निर्णयाने प्रशासकीय हस्तक्षेपाला तूर्तास लगाम बसला आहे.
तळेगाव दाभाडे येथील मावळ तालुका कृषी उत्पन्न बाजार समितीच्या एकूण १८ संचालकांपैकी १३ संचालकांनी एप्रिल महिन्यात पदांचे राजीनामे सहाय्यक निबंधकांकडे सादर केले होते. १३ संचालकांनी राजीनामा दिल्याने समितीची गणपूर्ती पूर्ण होत नसल्याचे कारण पुढे करीत जिल्हा उपनिबंधक, पुणे ग्रामीण यांनी १३ एप्रिल २०२६ रोजी बाजार समितीवर प्रशासक म्हणून वडगावचे सहायक निबंधक नवनाथ अनपट यांची नियुक्ती केली.
जिल्हा उपनिबंधकांच्या या आदेशाला सभापती सुभाष जाधव आणि इतर पाच संचालकांनी न्यायालयात आव्हान दिले होते. न्यायालयाने पणन मंत्री यांच्याकडे हे प्रकरण सुनावणी आणि निर्णयाकरिता वर्ग केल्यानंतर, २८ एप्रिल २०२६ रोजी पणन मंत्र्यांपुढे या प्रकरणाची सुनावणी पार पडली.
अपिलकर्त्यांच्या वतीने ॲड. अभय ईनामदार आणि ॲड. निरंजन देसाई यांनी युक्तिवाद केला की, संचालकांनी त्यांचे राजीनामे कायद्यानुसार सभापतींकडे न देता थेट निबंधकांकडे दिले होते, जे कायदेशीररीत्या अवैध आहेत. तसेच, राजीनाम्यांवरील स्वाक्षऱ्यांची कोणतीही पडताळणी करण्यात आली नव्हती आणि संचालकांना आपले म्हणणे मांडण्याची पुरेशी संधी दिली गेली नव्हती.
सहकार मंत्र्यांनी आपल्या आदेशात स्पष्ट नमूद केले की, महाराष्ट्र कृषी उत्पन्न पणन अधिनियमातील कलम १६ (१) नुसार राजीनामे सभापतींना देणे अपेक्षित असताना ते निबंधकांकडे देण्यात आले. तसेच राजीनाम्यांची खात्री न करता, व संचालकास वैयक्तिक सुनावणीची पुरेशी संधी न देता आदेश पारीत केल्याचे दिसून येते. तसेच प्रशासक नियुक्त करण्यापूर्वी महाराष्ट्र राज्य कृषी पणन मंडळाशी आवश्यक सल्लामसलत केल्याचे दिसून येत नाही. या कायदेशीर त्रुटी लक्षात घेता, मंत्र्यांनी जिल्हा उपनिबंधकांच्या १३ एप्रिल २०२६ च्या आदेशाला स्थगिती देण्याचा निर्णय घेतला.
या स्थगिती आदेशामुळे बाजार समितीचे कामकाज प्रशासकाच्या हाती नसणार हे स्पष्ट झाले आहे, या निर्णयाचे मावळ भाजपा कडून स्वागत होत आहे. तसेच पुढील सुनावणीकडे तालुक्याचे लक्ष लागले आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मुंबई-पुणे द्रुतगती मार्गावरील मिसिंग लिंकचे थाटात लोकार्पण ! “हा मिसिंग लिंक नव्हे तर कनेक्टिंग लिंक” – मुख्यमंत्री देवेंद्र फडणवीस
– बारावी बोर्ड परीक्षेचा निकाल जाहीर ! राज्याचा एकूण निकाल ८९.७९ टक्के, यंदाही मुलींचीच बाजी – पाहा सविस्तर निकाल
– शेतकऱ्यांनो… २० मे पूर्वी आपला फार्मर आयडी काढून घ्या, अन्यथा कृषी योजनांचा लाभ मिळणार नाही
– लोणावळा शहरातील पार्किंगची समस्या सुटणार, रेल्वे प्रशासन वाहनतळ विकसित करणार ; खासदार बारणे यांची माहिती
