Dainik Maval News : तळेगाव दाभाडे, तळेगाव एमआयडीसी आणि चाकण औद्योगिक क्षेत्रांतील वाहतूक कोंडीची समस्या सोडविण्यासाठी पुणे महानगर प्रदेश विकास प्राधिकरणाने (पीएमआरडीए) महत्वपूर्ण पावले उचलली आहेत. यात पुणे- नाशिक महामार्गावर चार पर्यायी बाह्यवळण रस्ते तयार करण्यात येणार आहेत. यासाठी भूसंपादन प्रक्रिया सुरू करण्यात आली आहे. याचबरोबर प्रमुख जिल्हा मार्गांची सुधारणा करण्यात येत असून, हे काम प्रगतिपथावर आहे.
‘पीएमआरडीए’कडून चाकण आणि तळेगाव परिसरासाठी पूर्व बाह्यवळण मार्ग प्रस्तावित असून, त्याचाच भाग म्हणून चार रस्ते तयार केले जाणार आहेत. त्यासाठी भूसंपादन प्रक्रियेला गती देण्यात आली आहे.
तळेगाव-चाकण महामार्गावरील हिंगणे चौक ते चाकण औद्योगिक क्षेत्र टप्पा तीन येथे खराबवाडीला जोडणारा रस्ता तयार केला जाणार आहे. हा रस्ता ९०० मीटर लांबीचा आणि ३० मीटर रुंद असेल. हिंगणे ते चौक फोक्सवॅगन कंपनीला जोडणारा हा रस्ता असेल. या रस्त्यामुळे तळेगाव, चाकणमधील टप्पा दोन व तीनमधून नाशिक व पुण्याकडे जाणारी वाहतूक पुणे-नाशिक महामार्गाशी जोडली जाईल. त्यातून तळेगाव चौक आणि चाकणमधील वाहतूक कोंडी कमी होणार आहे.
नाणेकरवाडीतील सॅनी कंपनी ते समृद्धी सीएनजी पंपाला जोडणारा १.२ किलोमीटर लांबीचा आणि १५ मीटर रुंद रस्ता तयार केला जाणार आहे. हा रस्ता तळेगाव आणि चाकणमधील टप्पा दोन व तीनला पुणे-नाशिक महामार्गाशी जोडेल. यामुळे मुख्य चाकण चौकातील कोंडी कमी होण्यास मदत होईल. याचबरोबर मेदनकरवाडीतील बंगला वस्ती चौक ते रासे फाटा पर्यंतचा २.५ किलोमीटर लांबीचा आणि ३५ मीटर रुंद रस्ता तयार केला जाणार आहे.
हा रस्ता पुणे, तळेगाव आणि चाकण टप्पा दोन व तीनला नाशिक महामार्गावरून शिक्रापूर राज्य मार्गावर रासे फाटा येथे जोडतो. तसेच, पश्चिम बाह्यवळण मार्गाअंतर्गत पुणे-नाशिक महामार्गाला चाकण टप्पा पाचला जोडणारा ८५० मीटर लांबीचा रस्ता आणि ४५ मीटर रुंद विकसित केला जाणार आहे. यामुळे चाकण चौक, आंबेठाण चौकातील अवजड वाहतूक जलद होणार आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– पवना बंद जलवाहिनी विरोधात हुतात्म्यांचे बलिदान आजही संघर्षाची प्रेरणा ; शिवसेना मावळ परिवाराकडून आदरांजली
– मावळ तालुक्यात जागतिक आदिवासी दिन उत्साहात ; भव्य बाईक रॅली, आदिवासी पारंपारिक नृत्य ठरले आकर्षण
– ३५ दिवसांच्या प्रवासानंतर संत तुकाराम महाराजांची पालखी देहूगावात परतली ; भाविकांकडून उत्साहात स्वागत
