Dainik Maval News : वारंवार तक्रार करून देखील ग्रामपंचायतीकडून आपली समस्या न सोडविली गेल्याने हताश झालेल्या व्यक्तीने ग्रामसभेत अंगावर रॉकेल ओतून घेत आत्मदहन करण्याचा प्रयत्न केला. ही गंभीर घटना सोमवारी (दि. ८ सप्टेंबर) रोजी मावळ तालुक्यातील खडकाळा (कामशेत) ग्रामपंचायत येथे घडली. रामचंद्र धावडे असे आत्मदहन करण्याचा प्रयत्न केलेल्या व्यक्तीचे नाव आहे.
मिळालेल्या माहितीनुसार, रामचंद्र धावडे यांचे घर शेतात आहे. ते मागील सहा वर्षांपासून शेतात राहतात. त्यांच्या शेतात गावातील सांडपाणी येत आहे. हा प्रकार मागील चार वर्षांपासून सुरु आहे. पाऊस पडल्यानंतर सांडपाण्यात वाढ होऊन हे पाणी त्यांच्या घरात येते. गावातील सांडपाण्यासोबत शेतातील साप, विंचू, बेडूक असे प्राणी देखील घरात येत. मागील चार वर्षांपासून धावडे यांनी ग्रामपंचायतीकडे सांडपाणी इतर ठिकाणी वाळविण्याबाबत मागणी केली. मात्र त्यांना नेहमी उडवाउडवीची उत्तरे मिळाली.
सोमवारी खडकाळे ग्रुप ग्रामपंचायत मध्ये ग्रामसभेचे आयोजन करण्यात आले होते. या ग्रामसभेत सरपंच रुपेश गायकवाड आणि ग्रामस्थ रामचंद्र धावडे देखील उपस्थित होते. धावडे यांनी ग्रामसभेत आपला प्रश्न उपस्थित केला. ग्रामसेवक धनंजय देशमुख यांनी यासाठी निधी नसल्याचे सांगितले. यावेळी देखील नेहमीप्रमाणे त्यांची तक्रार ऐकून घेतली गेली नाही. त्यामुळे वैतागून त्यांनी भर ग्रामसभेत स्वतःच्या अंगावर रॉकेल ओतून घेत आत्मदहन करण्याचा प्रयत्न केला.
ग्रामसभेत उपस्थित ग्रामस्थांनी त्यांना अडवून त्यांच्या हातातील रॉकेलची बाटली आणि माचिस हिसकावून घेतली. त्यानंतर कामशेत पोलिसांना बोलावण्यात आले. रामचंद्र धावडे यांच्या जागेत जाऊन तात्काळ पाहणी करण्यात आली. त्यानंतर लगेच जेसीबीच्या साहाय्याने कामाला सुरुवात करण्यात आली. धावडे यांच्या शेतात येणाऱ्या सांडपाण्याच्या लाईन बुजवण्यात आल्या. आजवर निधी नसल्याचे कारण सांगणाऱ्या ग्रामपंचायत प्रशासनाने या घटनेनंतर तात्काळ कार्यवाही केली. एकूणच ग्रामपंचायतीच्या ढीसाळ अन् बेजबाबदार कारभाराबद्दलही आता संताप व्यक्त होत आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
अधिक वाचा –
– पितृपक्षात श्राद्ध का करावे? श्राद्धाच्या तिथी आणि पद्धती, जाणून घ्या सर्वकाही । Pitru Paksha
– कौतुकास्पद ! डॉ. श्री. नानासाहेब धर्माधिकारी प्रतिष्ठान यांच्या कडून लोणावळा येथे निर्माल्य संकलन अभियान । Lonavala News
– आदिवासी विकासाला गती देण्यासाठी ‘आदी कर्मयोगी’ अभियान ; जिल्हाधिकारी कार्यालयात कार्यशाळा संपन्न । Pune News
