महाराष्ट्रातील काही भागात तीन ते चार दिवस अवकाळी पाऊस होणार असल्याचा इशारा देण्यात आला होता. त्यानुसार शनिवारी, दि. 25 नोव्हेंबर आणि आज रविवार, दि. 26 नोव्हेंबर महाराष्ट्रातील अनेक ठिकाणी जोरदार अवकाळी पाऊस बरसला. काही भागात तर गारपीट झाल्याचीही माहिती समोर येत आहे. पुणे जिल्ह्यालाही अवकाळी पावसाचा इशारा देण्यात आला होता. त्यानुसार रविवारी दिवसभर वातावरण काहीसे ढगाळ राहिल्याचे दिसले. अखेरीस रविवारी सायंकाळी पुणे शहर आणि जिल्ह्यातील बऱ्याच भागात जोरदार पाऊस झाला. मावळ तालुक्यातही अत्यंत जोरदार पाऊस झाला. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
वडगाव मावळ भागात रविवारी सायंकाळी अतिमुसळधार स्वरुपातील पाऊस बरसला. साधारण अर्धा तास – तासभर झालेल्या अवकाळीने नागरिकांची दाणादाण उडवली. ऐन संध्याकाळी आणि त्यातही रविवारी झालेल्या पावसाने बाजारपेठ भागात नागरिकांची मोठी धांदल उडाली. तसेच मुसळधार पावसामुळे काही भागात वीज गायब झाल्याचेही चित्र दिसून आले. वडगाव मावळसह कामशेत, तळेगाव, लोणावळा या शहरी ठिकाणी आणि आंदर मावळ, पवनमावळ अशा सर्वदूर भागात पाऊस झाल्याची माहिती समोर येत आहे.
मावळ तालुक्यात सध्या भाताची काढणी सुरु आहे. अशा परिस्थितीत हाता तोंडाशी आलेल्या भात पिकाचे नुकसान होण्याची दाट शक्यता आताचा अवकाळी पावसामुळे निर्माण झाली आहे. वर्षभर ज्या पिकाच्या भरवशावर अवलंबून राहावे, त्याच पिकाच्या ऐन काढणीवेळी अवकाळीचा फेरा आल्याने शेतकरी मोठा चिंतेच्या खाईत कोसळला आहे. ( Unseasonal Rain In Maval Taluka Rain Update Pune )
अधिक वाचा –
– भाडे करार करायचाय? एजंट हजारो रूपये मागतोय? काळजी करू नका, घरबसल्या ‘असा’ करा भाडे करार
– जांबवडे गावच्या नवनिर्वाचित सरपंच, उपसरपंच आणि ग्रामपंचायत सदस्यांचा सत्कार
– भारताच्या राष्ट्रपती द्रौपती मुर्मू मावळ तालुक्यात येणार, वाचा अधिक
