लोकसभा निवडणूकांचा निकाल जाहीर झाला आणि मावळ लोकसभा मतदारसंघात श्रीरंग आप्पा बारणे यांनी इतिहास घडवला. सलग तिसऱ्यांदा शिवसेना पक्षाकडून धनुष्यबाणाच्या चिन्हावर बारणे दिल्लीत खासदार म्हणून निवडून गेलेत. आज (दि. 7 जून) दिल्लीत एनडीए आघाडीच्या नवनिर्वाचित खासदारांची बैठक होती. या बैठकीला शिवसेना पक्षाचे सर्व खासदार आणि पक्ष प्रमुख एकनाथ शिंदे उपस्थित होते. एनडीएच्या बैठकीत नरेंद्र मोदी यांची नेतेपदी निवड करण्यात आली. त्यानंतर संसदेतील शिवसेना पक्ष कार्यालयात शिवसेनेच्या नवनिर्वाचित खासदारांची बैठक संपन्न झाली. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअॅप चॅनेलवर )
सदर बैठकीत कल्याण लोकसभा मतदारसंघातील नवनिर्वाचित खासदार श्रीकांत शिंदे यांची शिवसेना पक्षाच्या संसदीय दलाच्या गटनेते पदी निवड करण्यात आली. तर मावळचे खासदार श्रीरंग आप्पा बारणे यांच्यावर शिवसेना पक्षाचे संसदेतील प्रतोद पदाची जबाबदारी देण्यात आली. देशात नरेंद्र मोदी यांच्या नेतृत्वात तिसऱ्यांदा एनडीएचे सरकार येण्याचा मार्ग मोकळा झालाय. त्यात शिवसेना पक्षालाही वाटा मिळणार आहे. प्राप्त माहितीनुसार शिवसेनेला केंद्रात एक कॅबिनेट तर दोन राज्यमंत्रीपदे मिळण्याची शक्यता आहे. या मंत्रिपदातही श्रीकांत शिंदे आणि श्रीरंग बारणे यांचे नाव आघाडीवर आहे.
अशी झाली निवड –
गटनेता निवडीसाठी शिवसेना संसदीय समितीची बैठक संसद भवनातील शिवसेना पक्ष कार्यालयात पार पडली. यावेळी श्रीरंग बारणे यांनी गटनेता निवडीसाठी श्रीकांत शिंदे यांच्या नावाचा प्रस्ताव मांडला. या प्रस्तावाला बुलढाण्याचे खासदार प्रतापराव जाधव यांनी अनुमोदन दिले. त्यानंतर बैठकीला उपस्थित सर्व शिवसेना खासदारांनी एकमताने श्रीकांत शिंदे यांची गटनेता म्हणून निवड केली. त्यानंतर श्रीरंग बारणे यांची प्रतोद म्हणून नियुक्ती करण्यात आली. शिवसेनेचा लोकसभेतील गटनेता निवडण्याची ही प्रक्रिया शिवसेना पक्षांतर्गत करण्यात आली आहे. लोकसभा सभापतींची निवड झाल्यानंतरच अधिकृतपणे शिवसेना लोकसभा गटनेतेपदाची निवड प्रक्रिया पार पडणार आहे.
लोकसभा निवडणूकीत शिंदेंच्या शिवसेनेला चांगले यश –
लोकसभा निवडणुकीत एकनाथ शिंदे यांच्या शिवसेना पक्षाने 15 जागा लढवल्या होत्या. त्यापैकी 7 जागांवर शिंदे गटाचे खासदार निवडून आले आहेत. यात बुलढाणा, औरंगाबाद, कल्याण, ठाणे, मुंबई उत्तर पश्चिम मावळ आणि हातकलंगले या मतदारसंघांचा समावेश आहे. निवडून आलेल्या खासदारांमध्ये एकनाथ शिंदे यांचे सुपूत्र श्रीकांत शिंदे यांनी आणि मावळचे खासदार श्रीरंग बारणे यांनी खासदारकीची हॅटट्रीक केली आहे. आता या दोघांवरही पक्षाकडून मोठी जबाबदारी देण्यात आली आहे.
अधिक वाचा –
– पवार कुटुंबाचा आजवर तीन वेळा पराभव, प्रत्येक पिढीने पाहिलाय एक पराभव, पाहा नावे । Pawar Family Defeat In Election
– पावसाळा सुरु होतोय ! नागरिकांनो आपले घर आणि परिसर ठेवा स्वच्छ; हिवताप – डेंग्यू सारख्या आजारांपासून करा बचाव
– मुंबईत राष्ट्रवादीच्या आमदारांची बैठक ! आमदार सुनिल आण्णांसह 5 जणांची दांडी, चर्चांना उधाण, अजितदादा म्हणाले…
