Pawar Family Defeat In Election : लोकसभा निवडणूक 2024 चे अंतिम निकाल जाहीर झाले आहेत. यंदाची लोकसभा निवडणूक महाराष्ट्रासाठी अत्यंत खास राहिली. महाराष्ट्रात शिवसेना आणि राष्ट्रवादी काँग्रेस या प्रमुख प्रादेशिक पक्षांच्या फुटीनंतरची ही पहिलीच सार्वत्रिक निवडणूक होती. त्यामुळे या निवडणूकीला अनन्यसाधारण महत्व होते. यासह राज्यातील अनेक लढती या देशापातळीवर चर्चेच्या ठरल्या होत्या. त्यातील प्रमुख लढत होती, ती म्हणजे पवार कुटुंबातील ननंद – भावजय यांच्यातील. ( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
बारामती लोकसभा मतदारसंघाच्या निवडणूकीत शरद पवार यांची लेक सुप्रिया सुळे आणि अजित पवार यांच्या पत्नी सुनेत्रा पवार या आमनेसामने होत्या. राष्ट्रवादीतील फुटीनंतरची ही निवडणूक आणि त्यातही थेट पवार कुटुंबात लढत होत असल्याने संपूर्ण देशाचे लक्ष या लढतीकडे लागले होते. निकाल काहीही लागो, पण पराभव पवार कुटुंबाचाच होणार, हे सर्वांनाच माहिती होते. आणि झाले अगदी तसेच. या निवडणूकीच्या निमित्ताने पवार कुटुंबाने आणखीन एक पराभव पाहिला. पवार कुटुंबातील हा तिसरा पराभव होता. या लेखात आपण हे तिनही पराभव पाहणार आहे. ( Lok Sabha 2024 Result Maharashtra Pawar Family Four Generations In Politics Three Defeat )
वसंतराव पवार –
पवार कुटुंब म्हटलं की शरद पवारांचे नाव सर्वांत आधी येते. 1967 पासून संसदीय राजकारणात असलेले शरद पवार ह्यांनी स्वतः कधीही पराभव पाहिलेला नाही. परंतू त्यांच्या कुटुंबातील तिघांनी आजवर पराभव पाहिला आहे. त्यातील पहिलं नाव आहे ते वसंतराव पवार. वसंतराव पवार हे शरद पवार यांचे थोरले बंधू, ते शेतकरी कामगार पक्षात काम करत होते. तर शरद पवार काँग्रेसचे कार्यकर्ते होते. 1958 साली तत्कालीन पोटनिवडणूकीत वसंतराव पवार यांच्याविरुद्ध गुलाबराव जेधे खासदारकीच्या निवडणूकीत उभे होते. त्यावेळी शरद पवार यांनी काँग्रेस कार्यकर्ता म्हणून गुलाबराव जेधेंचा प्रचार केला आणि त्यावेळी वसंतराव पवार यांचा पराभव झाला. पवार कुटुंबाने पाहिलेला हा पहिला पराभव.
पार्थ पवार –
पवार कुटुंबाने त्यानंतरचा पराभव पाहिला तो थेट 2019 साली. अजित पवार यांचे सुपूत्र पार्थ पवार हे मावळ लोकसभा मतदारसंघातून निवडणूक लढवत होते. अजित पवारांचा पाठींबा आणि कार्यकर्त्यांचे बळ यामुळे त्यांच्यासाठी ही निवडणूक सोपी वाटत होती. तर पवारांच्या नव्या पिढीतील पार्थ हे पहिलेच होते. त्यामुळे अजितदादांनी जिवाचे रान केले. मात्र श्रीरंग बारणे यांना शिवसेना पक्षा सोबतच भाजपा आणि मित्रपक्षांची चांगली साथ मिळाली आणि पार्थ पवार पराभूत झाले. लेकाचा पराभव हा अजित पवार यांच्या चांगलाच जिव्हारी लागला. पवार कुटुंबाचा हा दुसरा पराभव होता.
सुनेत्रा पवार –
सुनेत्रा पवार यांच्या रुपाने आता पवार कुटुंबाने तिसरा पराभव पाहिला आहे. गतवर्षी राष्ट्रवादी काँग्रेस पक्षात उभी फुट पडली. अजित पवार यांच्या सोबत एक मोठा आमदारांचा गट बाजूला झाला. आणि शरद पवार हे त्यांच्या समर्थक आमदार – खासदार सह वेगळे झाले. यात पुढे पक्षाचे नाव आणि चिन्ह अजित पवार गटाला मिळाले. तर शरद पवार गटाला राष्ट्रवादी काँग्रेस शरदचंद्र पवार हे नाव आणि तुतारी वाजवणारा माणूस हे चिन्ह मिळाले. ह्या राजकीय घडामोडीत लोकसभा निवडणूका जाहीर झाल्या आणि अनपेक्षितरित्या बारामतीत सुनेत्रा पवार व सुप्रिया सुळे एकमेकांसमोर उभ्या राहिल्या. ननंद – भावजय यांच्यातील या लढतीत अखेर सुप्रिया सुळे यांनीच बाजी मारली. परंतू सोबतच अजित पवार यांच्या पत्नी सुनेत्रा पवार यांचा पराभव झाला. हा पवार घराण्यातील तिसरा पराभव ठरलाय.
अधिक वाचा –
– संजोग वाघेरे यांच्या पराभवाची प्रमुख 5 कारणे, नक्की वाचा । Maval Lok Sabha 2024
– महाराष्ट्रात महाविकासआघाडीला घवघवीत यश ! वडगाव मावळ येथे मविआ कार्यकर्त्यांकडून आनंदोत्सव साजरा । Vadgaon Maval
– श्रीरंग बारणेंच्या विजयानंतर मावळात भाजपाचा जल्लोष ! वडगाव आणि तळेगाव शहरात फटाके फोडून मिठाईचे केले वाटप । Maval News
