Dainik Maval News : वर्षाचा पहिला दिवस असल्याने बुधवारी (दि.1) कार्ला गडावर एकविरा देवीच्या दर्शनासाठी भाविकांनी मोठी गर्दी केली होती. परंतु या गर्दीतील काही हुल्लडबाज आणि अतिउत्साही भाविकांनी धूराचे फटाके फोडल्याने गडावर असलेल्या मधमाशांच्या पोळ्याला इजा झाली आणि संतप्त मधमाशांनी गडावरील भाविकांवर हल्ला चढवला. यामुळे काहीवेळ एकच गोंधळ उडाला होता. मधमाशांच्या या हल्ल्यात काही भाविक किरकोळ जखमी झाले.
प्राप्त माहितीनुसार बुधवारी कार्ला गडावर एकविरा देवीच्या दर्शनासाठी अनेक भाविक दाखल झाले होते. मोठ्या संख्येने भाविक गडावर उपस्थित होते. यात काही भाविक हे पालख्या घेऊन गडावर आले होते. यातील काही भाविकांनी वाद्यांचा जोरजोरात आवाज करीत रंगीत धुराचे फटाके फोडले. यातून पसरलेल्या धुरामुळे मधमाशांच्या पोळ्याला धक्का बसला व मधमाशा संतप्त झाल्या.
संतप्त मधमाशांनी भाविकांवर हल्ला चढवला. लेणी परिसरात असलेले मधमाश्यांचे पोळे उठले आणि त्यांनी गडावर आलेल्या भाविकांवर हल्ला केला. यामुळे गडावर काहीकाळ भाविकांची धांदल उडाली होती. भाविकांच्या या पळापळीने मधमाश्या आणखीनच पसरल्या. दुपारी साधारण साडेबाराच्या दरम्यान ही घटना घडली.
अतिउत्साही भाविक आणि नियोजनाचा अभाव यामुळे अशा घटना घडत असतात. सुदैवाने यात जिवितहानी झाली नाही. परंतु अनेक भाविक जखमी झालेत. स्थानिक ग्रामस्थ व एकविरा देवस्थान ट्रस्टच्या सदस्यांनी जखमींना तत्काळ गडावरून खाली आणले आणि प्रथमोपचार केले. काही भाविकांना उपचारासाठी दवाखान्यातही हलविण्यात आले. काही कालावधीनंतर एकविरा मंदिर परिसरातील परिस्थिती पूर्ववत झाली.
गडावर फटाका बंदी कायम ठेवण्याची मागणी –
मुंबईच्या कुलाबा येथून देवीची पालखी आली होती, त्या पालखीतल्या काही भक्तांनी फटाके वाजविले. त्याचा फटका बाकीच्या भक्तांना बसला, अशी चर्चा होत आहे. परंतु या घटनेनंतर गडावर फटाके वाजविण्यावर बंदी असतानाही काही भाविक याकडे दुर्लक्ष करतात व फटाके फोडतात. यामुळे यापुढे एकविरा गडावर फटाका बंदी कायम असावी अशी मागणी स्थानिकांनी केली आहे.
( मावळ तालुक्यातील प्रत्येक घडामोडीची अपडेट मिळवा दैनिक मावळच्या व्हॉट्सअ‍ॅप चॅनेलवर )
अधिक वाचा –
– अनाधिकृत नळजोड धारकाला वीस हजाराचा दंड, उघड्यावर कचरा टाकल्यास एक हजाराचा दंड, नगरपंचायतीचा निर्णय । Dehu News
– कचऱ्यातील नारळापासून कोकोपीट खताची निर्मिती ; तळेगाव नगरपरिषदेचा पर्यावरणपूरक उपक्रम । Talegaon Dabhade
– चौकाचौकात वाहतूक कोंडी ! वाहतूक कोंडीमुळे पर्यटकांसह मावळातील स्थानिक नागरिक त्रस्त । Maval News
