Dainik Maval News : मावळ पंचायत समितीच्या सभापतीपदी राष्ट्रवादी काँग्रेस पक्षाच्या नवनिर्वाचित पं.स. सदस्या सुनीता मनोहर येवले यांची, तर उपसभापतीपदी साहेबराव नारायण कारके यांची बिनविरोध निवड झाली. या निवडीसह जवळपास पंचवीस वर्षांनंतर मावळ पंचायत समितीमध्ये पक्षाचे पदाधिकारी विराजमान झाल्याने राष्ट्रवादी काँग्रेस पक्षाच्या कार्यकर्त्यांनी आनंदोत्सव साजरा केला.
मागील महिन्यात झालेल्या निवडणुकीत जिल्हा परिषदेच्या पाच आणि पंचायत समितीच्या दहाही जागांवर राष्ट्रवादी काँग्रेसच्या उमेदवारांचा विजय झाला होता. तदनंतर सोमवारी (दि.९ मार्च) सभापती आणि उपसभापती पदाच्या निवडीसाठी मावळ पंचायत समितीच्या सभागृहात पीठासन अधिकारी तथा प्रांताधिकारी सुरेंद्र नवले यांनी विशेष सभा आयोजित केली होती.
याप्रसंगी तहसीलदार विक्रम देशमुख, गटविकास अधिकारी कुलदीप प्रधान, सहायक गटविकास अधिकारी सेवक थोरात यांसह राष्ट्रवादी काँग्रेसचे नवनिर्वाचित सदस्य तथा गटनेते दिलीप ढोरे यांच्यासह साहेबराव कारके, योगेश लोहोर, राजेंद्र कडलक, समीर जाधव, सुनीता येवले, प्राची गायकवाड, आशा मोरमारे, रेश्मा देवकर, शैला कालेकर हे सर्व नवनिर्वाचित सदस्य उपस्थित होते.
सभापतीपद हे नागरिकांचा मागास प्रवर्ग महिला याकरिता राखीव असल्याने या पदासाठी चांदखेड गणातून विजयी झालेल्या सुनीता येवले यांचा, तर उपसभापती पदासाठी सोमाटणे गणातून विजयी झालेले साहेबराव कारके यांचा एकमेव अर्ज आल्याने दोघांची बिनविरोध निवड झाल्याची घोषणा सुरेंद्र नवले यांनी केली. त्यानंतर प्रशासनातर्फे दोघांचा सत्कार करण्यात आला.
राष्ट्रवादी काँग्रेसकडून सत्कार सोहळा
मावळ तालुका राष्ट्रवादी काँग्रेसच्या वतीने पंचायत समितीचे नवनिर्वाचित सभापती, उपसभापती आणि सर्व जिल्हा परिषद व पंचायत समिती सदस्य तसेच, खरेदी विक्री संघाचे सभापती व उपसभापती आदींचा सत्कार समारंभ आयोजित करण्यात आला होता. याप्रसंगी आमदार सुनील शेळके, स्वाभिमानी रिपब्लिकन पक्षाचे अध्यक्ष रमेश साळवे, राष्ट्रवादी काँग्रेसचे जिल्हाध्यक्ष विठ्ठलराव शिंदे, तालुकाध्यक्ष गणेश खांडगे, ज्येष्ठ नेते बबनराव भेगडे, सुरेश चौधरी, काळुराम मालपोटे, नारायण ठाकर, दीपक हुलावळे, माउली ठाकर, कृष्णा कारके, रिपाइंचे तालुकाध्यक्ष लक्ष्मण भालेराव, नगराध्यक्षा अबोली ढोरे, महिलाध्यक्षा सुवर्णा राऊत आदी पदाधिकारी, कार्यकर्ते मोठ्या संख्येने उपस्थित होते.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मावळ कृषी उत्पन्न बाजार समितीचे सभापती संभाजी शिंदे यांचा राजीनामा !
– महत्वाची बातमी ! राज्यातील सर्व पाणंद रस्त्यांची नोंद सात बारा उताऱ्यावर होणार
– मावळ पंचायत समितीच्या सभापती आणि उपसभापती पदाची सोमवारी होणार निवड
– मुख्यमंत्री देवेंद्र फडणवीस यांनी मांडलेल्या अर्थसंकल्पात पुणे जिल्ह्याच्या वाट्याला नक्की काय मिळाले ?
