Dainik Maval News : तळेगाव दाभाडे शहरातील मालमत्ता कर वसुलीसाठी राबविण्यात आलेल्या अभय योजनेला नागरिकांचा चांगला प्रतिसाद मिळत असून, तळेगाव नगरपरिषदेने ७३.१७ टक्के करवसुली करण्यात यश मिळवले आहे. या योजनेअंतर्गत आतापर्यंत १,१७१ अर्ज प्राप्त झाले आहेत.
नगरपरिषदेकडून वसूल होण्यासारखी एकूण २८.०७ कोटी रुपयांची रक्कम असून, त्यापैकी २०.५३ कोटी रुपये वसूल करण्यात आले आहेत. शहरातील एकूण मालमत्ता कर ३७.१० कोटी रुपये आहे. यामध्ये नॅशनल हेवी कंपनीकडे ६.३८ कोटी, २७ मोबाईल टॉवरकडून १.१२ कोटी, दोन शासकीय धान्य गोदामांकडून ०.२८ कोटी आणि ७७ सील मिळकतींकडून १.२५ कोटी रुपये थकबाकी आहे. ही थकबाकी वसूल करण्यासाठी प्रशासनाकडून प्रयत्न सुरू आहेत.
अभय योजनेअंतर्गत नागरिकांना दिलासा मिळत असून, सुमारे २.७ कोटी रुपयांच्या व्याजावर १०० टक्के सूट देण्यात आली आहे. या योजनेमुळे थकबाकीदारांनी कर भरण्यास सकारात्मक प्रतिसाद दिला आहे. सध्या या योजनेचा प्रस्ताव नगर विकास विभागाच्या अप्पर मुख्य सचिवांकडे मंजुरीसाठी प्रलंबित असून, मंजुरी मिळाल्यानंतर नागरिकांना आणखी दिलासा मिळण्याची अपेक्षा आहे.
पाणीपट्टी वसुलीतही नगरपरिषदेने प्रगती साधली आहे. शहरात एकूण १८,२४४ नळजोड असून, त्यापैकी ६,७२४ पाणी मीटर बसवण्यात आले आहेत. एकूण ९.१७ कोटी रुपयांची पाणीपट्टी अपेक्षित असताना ४.३५ कोटी रुपये म्हणजेच ४७.४३ टक्के वसुली करण्यात आली आहे.
नगराध्यक्ष संतोष दाभाडे पाटील, उपनगराध्यक्ष गणेश काकडे आणि मुख्याधिकारी गिरीश दापकेकर यांच्या मार्गदर्शनाखाली कर विभागामार्फत ही वसुली मोहीम प्रभावीपणे राबविण्यात येत आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– प्रस्तावित एमआयडीसीला करुंज, बऊर, ब्राह्मणवाडी येथील स्थानिक शेतकऱ्यांचा विरोध कायम
– लेक लाडकी योजनेअंतर्गत पुणे जिल्ह्यात ९ हजाराहून अधिक मुलींना लाभ
– वडगाव मावळ पोलीस ठाणे परिसरातील बेवारस वाहने मूळ मालकांनी सात दिवसांत घेऊन जाण्याचे आवाहन
– मावळ तालुक्यातील ग्रामपंचायतींच्या रिक्त सदस्य पद आणि सरपंच पदासाठी पोटनिवडणूक
