Dainik Maval News : आंदर मावळ विभागाला शहर भागाशी जोडणाऱ्या महत्त्वाच्या भोयरे–सावळा रस्त्याच्या कामाने सध्या वेग घेतला असून डांबरीकरणासह रस्ता रुंदीकरणाची कामे युद्धपातळीवर सुरू आहेत. गेली अनेक वर्षांपासून प्रतीक्षेत असलेल्या या मार्गाच्या सुधारित कामामुळे परिसरातील वाहतूक अधिक गतिमान होणार असून पर्यटनवाढीलाही मोठी चालना मिळण्याची अपेक्षा व्यक्त होत आहे.
कोंडिवडे, भोयरे, किवळे, पारीठेवाडी, अनसुटे, मानकुली, कुणे, कुणेवाडी, तळपेवाडी, माळेगाव बुद्रूक ते सावळा या गावांना जोडणारा हा मार्ग आंदर मावळातील नागरिकांसाठी जीवनवाहिनी मानला जातो. रस्ता सुकर झाल्यानंतर दुचाकी, चारचाकी, बस तसेच मालवाहतूक करणाऱ्या वाहनांची ये-जा अधिक वेगाने होणार आहे. त्यामुळे दळणवळण सुलभ होण्यासोबतच स्थानिक अर्थकारणालाही बळ मिळणार असल्याचे चित्र आहे.
मात्र, रस्त्याचे काम अंतिम टप्प्याकडे जात असताना ग्रामस्थांनी सुरक्षिततेचा मुद्दाही पुढे आणला आहे. अनेक गावांच्या हद्दीतून जाणाऱ्या या मार्गालगत प्राथमिक शाळा, बसथांबे तसेच वयोवृद्ध नागरिकांची सततची वर्दळ असते. भविष्यात वाहनांचा वाढता वेग लक्षात घेता अपघाताचा धोका नाकारता येत नसल्याने आवश्यक त्या ठिकाणी स्पीड ब्रेकर उभारण्याची मागणी स्थानिकांकडून करण्यात येत आहे.
“रस्त्याचे काम होत असल्याने नागरिकांची अनेक वर्षांची अडचण दूर होत आहे. मात्र रस्ता चांगला झाल्यानंतर वाहनांचा वेग वाढणार हे निश्चित आहे. गावांच्या हद्दीत, शाळांजवळ आणि बसथांब्यांजवळ स्पीड ब्रेकर करणे अत्यंत गरजेचे आहे. प्रशासनाने वेळीच उपाययोजना कराव्यात,” असे मत किवळे येथील दिपक मदगे यांनी व्यक्त केले.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– पवना नदीचे पाणी पिण्याअयोग्य, बंदिस्त जलवाहिनीबाबत तोडगा काढा ; खासदार श्रीरंग बारणे यांचे मुख्यमंत्र्यांना साकडे
– आमदार सुनील शेळके यांच्या पुढाकारातून बौर, ब्राह्मणवाडी, करूंज येथील प्रस्तावित एमआयडीसी संदर्भात जिल्हाधिकारी कार्यालयात बैठक संपन्न
– वडगाव मावळ येथे इंद्रायणी भात बियाण्याचे वितरण केंद्र सुरू ; शेतकऱ्यांना मिळणार उच्च दर्जाचे बियाणे
