Dainik Maval News : तळेगाव दाभाडे शहरातील ‘मायमर’ हॉस्पिटलमध्ये प्रसूतीसाठी दाखल झालेल्या ३७ वर्षीय महिलेचा आणि नवजात बाळाचा मृत्यू झाला. ही घटना मंगळवारी रात्री (दि. १८) घडली. दरम्यान, आई आणि बाळ या दोघांच्या मृत्यूला डॉक्टरांचा हलगर्जीपणा कारणीभूत असल्याचा आरोप करत नातेवाइकांनी संताप व्यक्त केला.
रुपाली सोमनाथ इंदलकर (वय ३७, रा. कुसगाव, लोणावळा) असे मृत महिलेचे नाव आहे. रुग्णालयात व्हेंटिलेटर उपलब्ध नसल्याने हा अनर्थ घडल्याचा आरोप नातेवाईकांनी केला आहे. तसेच त्यावेळी उपस्थित संबंधित डॉक्टरांनी चार ते पाच तास उपचाराची माहिती लपविल्याचेही नातेवाईकांनी माध्यमांना सांगितले. याप्रकरणी सदोष मनुष्यवधाचा, हत्येचा गुन्हा दाखल व्हावा, अशी नातेवाईकांची मागणी आहे.
दरम्यान, घटनेची माहिती मिळताच आमदार सुनील शेळके यांनी तत्काळ रुग्णालयात जाऊन मृतांच्या नातेवाइकांची भेट घेतली व सांत्वन केले. तसेच ‘‘आरोग्यमंत्र्यांशी चर्चा करून ‘ओपन कॅमेरा’ शवविच्छेदन करण्यात येईल. महिनाभरात या प्रकारातील सत्य समोर येऊन कुटुंबियांना न्याय मिळेल’’ असे आश्वासन दिले.
‘‘संबंधित महिला थायरॉइड आणि उच्च रक्तदाबामुळे गंभीर अवस्थेत दाखल झाली होती. उपचारादरम्यान हृदयविकाराचा त्रास झाला. त्यामुळे सिझेरियन शस्त्रक्रिया केली. मात्र, मातेला वाचवता आले नाही. ‘एनआयसीयू’ बेड उपलब्ध नसल्याने बाळाचाही मृत्यू झाला. यात डॉक्टरांचा हलगर्जीपणा झालेला नाही,’’ असा दावा रुग्णालयाचे वैद्यकीय अधीक्षक डॉ. दर्पण महेशगौरी यांनी केला.
( दैनिक मावळचा व्हॉट्सअ‍ॅप चॅनेल जॉइन करण्यासाठी इथे क्लिक करा )
अधिक वाचा :
– लोणावळा ग्रामीण पोलीस स्टेशन हद्दीत गांजा बाळगणाऱ्याच्या मुसक्या आवळल्या ; स्थानिक गुन्हे शाखेची कारवाई
– टाकवे बुद्रुक जवळील इंद्रायणी नदी पुलावर खड्डे ; खड्ड्यातून लोखंडी सळई बाहेर; दुचाकीसह चारचाकी वाहनांना अपघाताचा धोका
– शिरवळ येथे पुणे-सातारा महामार्गावर झालेल्या अपघातात मावळातील चार युवकांचा मृत्यू
– महत्वाची बातमी ! पाथरगाव येथील इंद्रायणी नदीवरील जुना दगडी पूल सुरक्षिततेच्यादृष्टीने वाहतुकीसाठी बंद
