Dainik Maval News : मावळ तालुक्यातील राजकारणात मोठी घडामोड पाहायला मिळत आहे. मावळ तालुका कृषी उत्पन्न बाजार समितीत मागील महिना भरापासून घडलेल्या विविध नाट्यमय राजकीय घडामोडींनंतर अखेर आज मावळ तालुका कृषी उत्पन्न बाजार समिती बरखास्त झाली आहे.
तीन वर्षांपूर्वी झालेल्या बाजार समितीच्या निवडणूकीत राष्ट्रवादी काँग्रेसच्या पॅनलचे १७ आणि भाजपा च्या पॅनलचे १ संचालक निवडून आले होते. त्यानंतर पुढील दोन वर्षांत घडलेल्या राजकीय घडामोडीत भाजपाच्या गोटात ५ आणि राष्ट्रवादीच्या गोटात १३ संचालक राहिले. दरम्यान बाजार समितीवर राष्ट्रवादीचे स्पष्ट बहुमतातील सत्ता असतानाही नुकत्याच झालेल्या सभापती निवडीत भाजपाच्या उमेदवाराने राष्ट्रवादीच्या उमेदवाराचा पराभव केला. यामुळे संतप्त झालेले आमदार सुनील शेळके यांनी राष्ट्रवादीच्या सर्व संचालकांना राजीनामे देण्याचे आदेश दिले होते. त्यानुसार तेराही संचालकांनी राजीनामे सादर केले होते.
दरम्यान तेरा संचालकांच्या राजीनाम्यामुळे बाजार समितीत अवघे पाच संचालक राहिले. यामुळे बाजार समितीचे कामकाम होण्यासाठी आवश्यक त्या संचालकांची उपस्थिती नसणे अर्थात गणपूर्ती ( कोरम ) होत नसल्याने सलग दोन बैठका रद्द झाल्या. याच्या आधारे प्रकाश ल. जगताप जिल्हा उपनिबंधक, सहकारी संस्था ( पुणे ग्रामीण ) यांनी बाजार समिती बरखास्त करण्याचे आणि प्रशासक नियुक्तीचे आदेश दिले आहेत.
संचालक मंडळ अस्तित्वात नसल्यामुळे समितीचे कामकाज पूर्णतः ठप्प झाले आणि पहिली बैठकही कोरम अभावी फक्त चर्चेपुरतीच मर्यादित राहिली. यानंतर संपूर्ण प्रकरणाचा अहवाल सहाय्यक निबंधकांकडून जिल्हा उपनिबंधकांकडे सादर करण्यात आला. महाराष्ट्र कृषी उत्पन्न खरेदी-विक्री (विकास व विनियमन) अधिनियम 1963 अंतर्गत कलम 45(1) नुसार जिल्हा उपनिबंधक, सहकारी संस्था, पुणे (ग्रामीण) प्रकाश जगताप यांनी आदेश काढत तळेगाव दाभाडे कृषी उत्पन्न बाजार समिती बरखास्त करून प्रशासकाची नियुक्ती केली. सहाय्यक निबंधक, सहकारी संस्था, मावळ, जि. पुणे, नवनाथ अनपट यांची प्रशासक म्हणून नियुक्ती करण्यात आली असून आता समितीचे सर्व अधिकार त्यांच्या ताब्यात देण्यात आले आहेत.
आमदार सुनील शेळके यांची यशस्वी खेळी :
राष्ट्रवादीचे बहुमत असतानाही भाजपाचा सभापती निवडून आल्याने संपूर्ण राज्यात मावळच्या या प्रकरणाची चर्चा झाली. राष्ट्रवादीच्या पदरी मोठी नामुष्की आली. यामुळे संतप्त होऊन आमदार सुनील शेळके यांनी सर्व संचालकांचे राजीनामे घेतले होते. यानंतर आता थेट बाजार समिती बरखास्त झाल्याने सभापती म्हणून निवडून येऊनही भाजपाचे सुभाष जाधव यांना काम करता आलेले नाही.
दुसरीकडे पक्षांतर्गत असंतोष, फुटीरता आणि त्यानंतर आमदार सुनील शेळके यांनी घेतलेला कठोर निर्णय यामुळे संपूर्ण समीकरण बदलले असून पक्षशिस्तीचा नवा धडा आता कार्यकर्त्यांसह नेत्यांना मिळाला आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– पवना धरणग्रस्तांच्या प्रलंबित मागण्यांसंदर्भात संयुक्त संघटनेने घेतली आमदार सुनील शेळके यांची भेट
– मावळ, मुळशी, हवेलीचा चेहरामोहरा बदलणार ; ‘पीएमआरडीए’कडून 67 कोटींचा विकास आराखडा जाहीर
– जगाच्या नकाशावर गेलेली पुणे ग्रँड टूर सायकल स्पर्धेचा दुसरा हंगाम ; मावळमधील ‘या’ भागात होणार सायकल स्पर्धा
– वडगावात स्व.पै. केशवराव ढोरे प्रतिष्ठान आयोजित सामुदायिक विवाह सोहळा ; सात जोडप्यांचे होणार शुभमंगल सावधान
