Dainik Maval News : पवित्र देहू नगरीच्या विकासासाठी राज्य शासनाने ऐतिहासिक निर्णय घेत देहूच्या सर्वांगीण विकासाला मोठी चालना दिली आहे. संत तुकाराम महाराज जन्मस्थान जतन, संवर्धन आणि तीर्थक्षेत्र विकास आराखड्यास तब्बल ४१ कोटी रुपयांची मान्यता देण्यात आली असून मुख्यमंत्री देवेंद्र फडणवीस यांच्या अध्यक्षतेखाली झालेल्या महत्त्वपूर्ण बैठकीत हा निर्णय घेण्यात आला.
उपमुख्यमंत्री एकनाथ शिंदे, उपमुख्यमंत्री सुनेत्रा पवार यांच्यासह वरिष्ठ अधिकारी, देवस्थान विश्वस्त आणि प्रशासनातील मान्यवर उपस्थित असलेल्या या बैठकीत देहू नगरीच्या विकासाबाबत सविस्तर चर्चा करण्यात आली.
देहू नगरीचा जागतिक स्तरावर विकास व्हावा, संत तुकाराम महाराजांच्या पावन भूमीचे जतन करत भाविकांना आधुनिक सुविधा उपलब्ध व्हाव्यात आणि देहूचे आध्यात्मिक वैभव अधिक वृद्धिंगत व्हावे, या उद्देशाने शासनाने हा महत्त्वपूर्ण निर्णय घेतल्याचे बैठकीत स्पष्ट करण्यात आले. यावेळी आमदार सुनील शेळके यांनी देहूच्या विकासासंदर्भातील विविध प्रश्न प्रभावीपणे मांडत अनेक महत्त्वाच्या मागण्यांसाठी ठाम पाठपुरावा केला. देहू-येलवाडी रस्त्याचे काम तातडीने सुरू करणे, आषाढी वारीपूर्वी पालखी मार्गाची दुरुस्ती, शहरातील पाणीपुरवठा योजना, नवीन विद्युत उपकेंद्र, यात्रा अनुदान तसेच नागरिकांच्या सुरक्षेसाठी अत्याधुनिक चित्रण यंत्रणा उभारणे या मागण्या त्यांनी बैठकीत ठामपणे मांडल्या. त्यांच्या पाठपुराव्यानंतर संबंधित यंत्रणांना तातडीने कार्यवाहीचे निर्देश देण्यात आले.
विकास आराखड्यात संत तुकाराम महाराज जन्मस्थान वाड्याची पुनर्बांधणी, नवीन वास्तू उभारणी, परिसर सुशोभीकरण, प्रकाश व्यवस्था, बागबगिचे, जलविहार सुविधा तसेच भाविकांसाठी अत्याधुनिक सोयी उभारण्यात येणार आहेत. त्याचबरोबर देहूतील कायदा व सुव्यवस्था अधिक सक्षम करण्यासाठी नवीन पोलीस ठाणे उभारण्याचा निर्णयही सकारात्मक ठरला आहे.
देहूच्या विकासासाठी सातत्याने पाठपुरावा करणारे आमदार सुनील शेळके हे विकासकामांबाबत नेहमीच आक्रमक आणि तत्पर असल्याचे पुन्हा एकदा अधोरेखित झाले असून, त्यांच्या प्रयत्नांमुळे देहूच्या विकासाला नवी दिशा मिळाल्याची भावना नागरिकांतून व्यक्त होत आहे. संत तुकाराम महाराजांच्या पावन भूमीचे वैभव अधिक भव्य करण्यासाठी शासन आणि स्थानिक लोकप्रतिनिधी एकत्रितपणे कार्यरत असल्याचे या बैठकीतून स्पष्ट झाले.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– मतदार याद्यांच्या विशेष सखोल पुनरिक्षण कार्यक्रम (SIR) अनुषंगाने वडगाव मावळ येथे प्रशिक्षण शिबिर संपन्न
– मावळमधील महत्वाच्या विकासकामांबाबत आमदार सुनील शेळके यांच्या पुढाकारातून पीएमआरडीए कार्यालयात विशेष बैठक संपन्न
– पुणे जिल्ह्याच्या विकासाला गती ; जिल्हा वार्षिक योजनेसाठी १४७२ कोटींची तरतूद, गतवर्षीपेक्षा ९३ कोटींची वाढ
– पालकांनो, पाल्याचा शाळेत प्रवेश घेण्यापूर्वी ही बातमी वाचा ! पुणे जिल्हा परिषदेकडून जिल्ह्यातील ४५ अनधिकृत शाळांची यादी जाहीर
