Dainik Maval News : कामशेत पोलीस ठाण्याच्या हद्दीत खून आणि खुनाचा प्रयत्न असा धक्कादायक प्रकार उघडकीस आला आहे. मित्राचा खून केल्यानंतर गुन्ह्याची चर्चा बाहेर जाऊ नये म्हणून दोन आरोपींनी आपल्या तिसऱ्या साथीदारावर दगडाने जीवघेणा हल्ला केल्याची घटना समोर आली आहे.
पोलिसांनी दिलेल्या माहितीनुसार, आकाश दत्ता पिंगळे (वय २९, रा. साई, ता. मावळ) याचा खून करण्यात आला आहे. याप्रकरणी रंजीत रामचंद्र वाडेकर (वय ३६) आणि निखिल उर्फ दाद्या जितेंद्र माने (वय २८), दोघे रा. कामशेत यांना ताब्यात घेण्यात आले आहे.
या गुन्ह्यात रोहिदास अशोक चव्हाण (वय ३५, रा. चिखलसे/कामशेत) याचाही सहभाग असल्याचे निष्पन्न झाले आहे. मात्र, खुनाची माहिती बाहेर देत असल्याचा संशय आल्याने आरोपींनी त्याच्यावरच जीवघेणा हल्ला केला.
पोलिसांच्या माहितीनुसार, २८ मार्च रोजी तिघांनी संगनमताने आकाश पिंगळे याचा खून केला. त्यानंतर २९ मार्च रोजी सकाळी सुमारे ८ वाजण्याच्या सुमारास कामशेत येथील दौंडे कॉलनी परिसरात रोहिदास चव्हाण याच्या डोक्यात दगड घालून त्याचा खून करण्याचा प्रयत्न करण्यात आला.
या हल्ल्यात रोहिदास गंभीर जखमी झाला असून त्याच्यावर महावीर हॉस्पिटल येथे उपचार सुरू आहेत. दरम्यान, रविवारी सकाळी कामशेत गावातील श्री जीवन हॉस्पिटलजवळील पाण्याच्या टाकीजवळ एका अनोळखी व्यक्तीचा मृतदेह आढळून आला होता. तपासादरम्यान त्याची ओळख आकाश पिंगळे अशी पटली.
सीसीटीव्ही फुटेज, कॉल डिटेल रेकॉर्ड (CDR) आणि गुप्त माहितीच्या आधारे पोलिसांनी तपासाची दिशा निश्चित करत आरोपींपर्यंत पोहोचण्यात यश मिळवले. या प्रकरणी कामशेत पोलीस ठाण्यात गु.र.नं. ६८/२०२६ नुसार भारतीय न्याय संहिता कलम १०९, ३(५) अंतर्गत गुन्हा दाखल करण्यात आला आहे.
या प्रकरणात अशोक धनाजी चव्हाण (वय ५७, रा. चिखलसे) यांनी फिर्याद दिली आहे. घटनास्थळी उपविभागीय पोलीस अधिकारी गजानन टोम्पे, स्थानिक गुन्हे शाखेचे पोलीस निरीक्षक प्रमोद क्षीरसागर, तसेच सहाय्यक पोलीस निरीक्षक आकाश पवार यांनी भेट देऊन पंचनामा केला.
ही कारवाई कामशेत पोलीस स्टेशनचे प्रभारी अधिकारी आकाश पवार यांच्या मार्गदर्शनाखाली करण्यात आली असून पुढील तपास पोलीस उपनिरीक्षक दत्तात्रेय शेडगे करत आहेत.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– वडगाव मावळ येथे ३९.३३ कोटींच्या पाणीपुरवठा योजनेचा शुभारंभ ; आमदार सुनील शेळके यांच्या पुढाकारातून शहरवासीयांना दिलासा
– लोणावळ्यात एक रूपयासाठी तुफान राडा ! पेट्रोल पंपाच्या कार्यालयाची तोडफोड आणि कर्मचाऱ्यांना मारहाण ; 7 जणांसह अज्ञातांवर गुन्हा दाखल
– शेतकरी मित्रांनो, तुमचे बँक खाते तपासा ! मुख्यमंत्री व दोन्ही उपमुख्यमंत्र्यांच्या हस्ते शेतकरी महासन्मान निधी योजनेच्या आठव्या हप्त्याचे वितरण
