Dainik Maval News : अवैधरित्या शस्त्रे बाळगणाऱ्या आणि त्यांची तस्करी करणाऱ्या गुन्हेगारांविरुद्ध पिंपरी-चिंचवड पोलिसांनी कडक मोहीम उघडली आहे. मालमत्ता गुन्हे विरोधी पथकाने सोमाटणे फाटा परिसरात सापळा रचून पिस्टल विक्रीसाठी आलेल्या एका टोळीचा पर्दाफाश केला. या कारवाईत पोलिसांनी ४ देशी बनावटीची पिस्टल, ७ जिवंत काडतुसे आणि एक आलिशान कार असा एकूण १० लाख ९२ हजार रुपयांचा मुद्देमाल जप्त केला आहे.
पोलीस आयुक्त विनय कुमार चौबे यांनी शहरातील अवैध शस्त्रांच्या तस्करीवर कारवाई करण्याचे आदेश दिले होते. त्यानुसार, मालमत्ता गुन्हे विरोधी पथकाचे वरिष्ठ पोलीस निरीक्षक संजय चव्हाण यांच्या मार्गदर्शनाखाली पोलीस पथक गस्त घालत होते. यावेळी रेकॉर्डवरील गुन्हेगार सरदार सय्यद हा आपल्या साथीदारांसह तळेगाव दाभाडे परिसरातील सोमाटणे फाटा येथे शस्त्र विक्रीसाठी येणार असल्याची गोपनीय माहिती पोलिसांना मिळाली.
सदर माहितीच्या आधारे १० मार्च २०२६ रोजी पोलिसांनी निर्जनस्थळी सापळा रचला आणि एका मारुती सुझुकी फ्रॉन्स कारला वेढा घालून तीन संशयितांना ताब्यात घेतले. पोलिसांनी अटक केलेल्या आरोपींमध्ये १) सरदार अकबर सय्यद (वय २०, रा. तळेगाव दाभाडे), २) विशाल नाना कुडेकर (वय ३५, रा. खेड, पुणे) आणि ३) प्रशांत बबुशा सोनवणे (वय २८, रा. चेंबूर, मुंबई) यांचा समावेश आहे.
सुरुवातीला त्यांच्याकडून ३ पिस्टल आणि ६ काडतुसे मिळाली होती. मात्र, अधिक तपासादरम्यान आरोपी प्रशांत सोनवणे याच्याकडून आणखी १ पिस्टल आणि १ काडतूस हस्तगत करण्यात आले. अशा प्रकारे एकूण ४ पिस्टल आणि ७ जिवंत काडतुसे जप्त करून तळेगाव दाभाडे पोलीस ठाण्यात गुन्हा दाखल करण्यात आला आहे.
पोलिसांनी केलेल्या सखोल चौकशीत या शस्त्रांच्या तस्करीचे धागेदोरे मध्यप्रदेशपर्यंत पोहोचले आहेत. मुख्य आरोपी सरदार सय्यद याने ही शस्त्रे मध्यप्रदेशातील उमरटी येथील गुरुसिंग नावाच्या आरोपीकडून आणल्याचे निष्पन्न झाले आहे. याप्रकरणी पोलीस आता मध्यप्रदेशातील त्या फरार आरोपीचा शोध घेत आहेत. विशेष म्हणजे, अटकेत असलेला सरदार सय्यद हा सराईत गुन्हेगार असून, त्याच्यावर यापूर्वी चाकण पोलीस ठाण्यात अपहरण, खंडणी आणि ‘मोक्का’ सारखे गंभीर गुन्हे दाखल आहेत.
ही उल्लेखनीय कामगिरी पोलीस आयुक्त विनय कुमार चौबे, सह पोलीस आयुक्त शशिकांत महावरकर, अपर पोलीस आयुक्त सारंग आवाड, पोलीस उप-आयुक्त डॉ. शिवाजी पवार आणि सहाय्यक पोलीस आयुक्त डॉ. विशाल हिरे यांच्या मार्गदर्शनाखाली पार पडली. (Arms Trafficking Gang Arrested) वरिष्ठ पोलीस निरीक्षक संजय चव्हाण, स.पो.नि. गोरक्षनाथ बालवडकर आणि त्यांच्या पथकातील अंमलदारांच्या चोख कामगिरीमुळे शहरातील एक मोठी संभाव्य दुर्घटना टळली आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– महाराष्ट्राचे २२ वे राज्यपाल म्हणून जिष्णू देव वर्मा यांनी घेतली शपथ ; राजघराण्यातील व्यक्ती, कवी – लेखक अन् राजकारणी, जाणून घ्या नवीन राज्यपालांबद्दल
– ESMA Act : मोठी बातमी ! घरगुती गॅस सिलिंडर बुकिंगबाबत नियम बदलले , देशभरात ‘एस्मा’ लागू
– मोठी बातमी ! राज्यात 9 मार्चपासून नवीन ऑटो रिक्षांना परवाना देण्यास स्थगिती
– मावळ पंचायत समिती सभापती पदी सुनीता येवले आणि उपसभापती पदी साहेबराव कारके यांची बिनविरोध निवड
