Dainik Maval News : पर्यटननगरी अशी ओळख असलेल्या लोणावळा शहरात सध्या ऑनलाइन फसवणुकीचे प्रकार वाढत असल्याचे दिसून येत आहे. थंड हवेचे ठिकाण म्हणून जगप्रसिद्ध असलेल्या लोणावळा शहरात वेगवेगळ्या ठिकाणांहून मोठ्या संख्येने पर्यटक येतात. त्यासाठी पर्यटक ऑनलाइन सर्चिंग करीत असतात. याचदरम्यान नवख्या पर्यटकांना काही भामटे सोशल मीडियाच्या माध्यमातून बनावट व्हिला अथवा बंगल्यांच्या बुकिंगच्या नावाखाली आर्थिक गंडा घालत असल्याचे उघड झाले आहे.
ऑनलाईन फसवणूक करणाऱ्या भामट्यांकडून व्हिला – बंगल्यांचे आकर्षक फोटो, कमी दर आणि आकर्षक ऑफर्स दाखवून पर्यटकांना आमिष दाखविले जाते. त्यानंतर बुकिंग निश्चित करण्याच्या नावाखाली २० ते २५ हजार रुपयांपर्यंत आगाऊ रक्कम घेतली जाते. अनेकदा विश्वास बसावा म्हणून संबंधित ठिकाणाचे लाईव्ह लोकेशनही पाठवले जाते. मात्र प्रत्यक्षात पर्यटक लोणावळ्यात पोहोचल्यानंतर सांगितलेल्या ठिकाणी कुठलाही व्हिला किंवा बंगला अस्तित्वात नसल्याचे समोर येते. यातून पर्यटक आर्थिक फसवणुकीचे बळी ठरत आहेत.
अशा पद्धतीने फसवणूक झालेल्या मुंबईतील एका पर्यटकाने याबद्दल सांगितले आहे. “पैसे भरल्यानंतर आम्हाला व्हिलाचे लोकेशन पाठविण्यात आले. मात्र, लोणावळ्यात त्या पत्त्यावर पोहोचलो तेव्हा तिथे कोणताही व्हिला किंवा बंगला अस्तित्वातच नव्हता.”
दरम्यान अशा वाढत्या प्रकारांमुळे स्थानिक नागरिक आणि व्यावसायिकांमध्ये चिंता व्यक्त केली जात आहे. पर्यटन व्यवसायावर याचा नकारात्मक परिणाम होण्याची शक्यता वर्तविली असून प्रशासनाने या प्रकरणाची गांभीर्याने दखल घेऊन तातडीने कारवाई करावी, अशी मागणी होत आहे.
स्थानिक व्यावसायिकांच्या मते हे स्कॅम लोणावळ्याबाहेरील टोळ्यांकडून चालवले जात असून यामुळे लोणावळ्याच्या पर्यटन व्यवसायाची बदनामी होत आहे.
दरम्यान अशा सायबर फसवणुकीपासून बचावासाठी सजगता हाच उपाय असल्याचे तज्ज्ञांचे मत आहे. पर्यटकांनी बुकिंग करताना केवळ अधिकृत आणि विश्वसनीय संकेतस्थळांचाच वापर करावा, व्यवहारापूर्वी माहितीची खातरजमा करावी, तसेच अनोळखी लिंक, संशयास्पद ऑफर आणि अतिशय स्वस्त दरांच्या आमिषांना बळी पडू नये, असे आवाहन प्रशासनाकडून करण्यात आले आहे.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– प्रस्तावित एमआयडीसीला करुंज, बऊर, ब्राह्मणवाडी येथील स्थानिक शेतकऱ्यांचा विरोध कायम
– लेक लाडकी योजनेअंतर्गत पुणे जिल्ह्यात ९ हजाराहून अधिक मुलींना लाभ
– वडगाव मावळ पोलीस ठाणे परिसरातील बेवारस वाहने मूळ मालकांनी सात दिवसांत घेऊन जाण्याचे आवाहन
– मावळ तालुक्यातील ग्रामपंचायतींच्या रिक्त सदस्य पद आणि सरपंच पदासाठी पोटनिवडणूक
