Dainik Maval News : गडचिरोली जिल्ह्यातील अहेरी नगरपंचायतीचे कर निरीक्षक वैभव पांढरे (वय ३४) यांच्यावर झालेल्या जीवघेण्या हल्ल्याच्या निषेधार्थ तळेगाव दाभाडे नगर परिषद कार्यालयात अधिकारी व कर्मचाऱ्यांनी बुधवारी (दि. ११) जाहीर निषेध नोंदविला.
मुख्याधिकारी गिरीश दापकेकर, महाराष्ट्र राज्य संवर्ग संघटनेच्या सचिव ममता राठोड तसेच संघटनेच्या जिल्हाध्यक्षा कल्याणी लाडे यांच्या नेतृत्वाखाली हा निषेध करण्यात आला.
अहेरी नगरपंचायतीचे कर निरीक्षक वैभव पांढरे हे सकाळी फिरण्यासाठी गेले असताना जिल्हा परिषदेचे माजी अध्यक्ष अजय कंकडलवार आणि त्यांच्या सहकाऱ्यांनी त्यांच्यावर जीवघेणा हल्ला केल्याचा आरोप आहे. नगरपंचायतीने केलेल्या अनधिकृत बांधकामावरील कारवाईचा राग मनात धरून हा हल्ला करण्यात आल्याचे सांगितले जात आहे.
या घटनेचा निषेध करत महाराष्ट्र राज्य संवर्ग संघटनेच्या वतीने मुख्यमंत्री, उपमुख्यमंत्री तसेच प्रशासनातील वरिष्ठ अधिकाऱ्यांना निवेदन सादर करून संबंधित हल्लेखोरांवर कठोर कारवाई करण्याची मागणी करण्यात आली आहे. या मागणीला पाठिंबा दर्शवण्यासाठी तळेगाव दाभाडे नगरपरिषदेच्या अधिकारी व कर्मचाऱ्यांनी घोषणाबाजी करत हल्ल्याचा निषेध व्यक्त केला.
अशा प्रकारच्या हल्ल्यांमुळे शासकीय कर्मचाऱ्यांच्या सुरक्षिततेचा प्रश्न गंभीर बनल्याचे उपस्थितांनी नमूद केले. संबंधित आरोपींवर तातडीने कठोर कारवाई न झाल्यास भविष्यात कामबंद आंदोलन छेडण्याचा इशाराही देण्यात आला. आंदोलनाचे सूत्रसंचालन जनसंपर्क अधिकारी भास्कर वाघमारे यांनी केले.
( दैनिक मावळचा व्हॉट्सअॅप चॅनेल जॉइन करण्यासाठी इथे क्लिक करा )
अधिक वाचा :
– Pawana Dam Update : पवना धरणातील पाणीसाठ्यात झपाट्याने घट; केवळ २१ टक्के पाणीसाठा शिल्लक
– पुणे ग्रामीण पोलीस दलात मोठी खांदेपालट ; ३० पोलीस निरीक्षकांच्या बदल्या जाहीर
– तळेगाव एमआयडीसीमध्ये भीषण दुर्घटना! नवलाख उंब्रे जवळील कंपनीत गॅस गळतीमुळे दोन कामगारांचा मृत्यू, तिघांची प्रकृती गंभीर
– मावळातील औद्योगिक पट्ट्याला मिळणार मोठी चालना; तळेगाव परिसरात नवीन रेल्वे मालधक्का उभारण्याचे नियोजन
